Sangano reElection Resource Centre, ERC, rinoti rave kuenda kumatare edzimhosva richinyunyuta nemutengo wegwaro revavhoti, kana kuti Voters’ Roll warakaziviswa neZimbabwe Electoral Commission, uyo rinoti uri pamusoro zvakanyanyisa.
Richinyora padandemutande reTwitter, sangano iri razivisa kuti rave kutora matanho ekumatare rakabatana nesangano remagweta reZimbabwe Lawyers for Human Rights.
Election Resource Centre inoti iri kunyunyuta nemuripo wayakanzi ibhadhare neZEC kuti iwane gwaro iri unoita madhora ekuAmerica anoita zviuru zana nemakumi masere nezvinomwe zvine mazana maviri nemakumi matatu nemasere, kana kuti US$187 237.00, kuti rikwanise kuwana gwaro revavhoti rimwechete riri mumapepa.
Asi mutauriri weZimbabwe Electoral Commission, VaJasper Mangwana, vanoti mutengo uyu unosvika pamari iyi nekuda kwekukura kwegwaro iri, iro ravanoti rine mapeji zviuru zana nemakumi masere nezvinomwe nemazana maviri nemakumi matatu nemasere.
VaMangwana vanoti peji imwechete inenge ichitengeswa nedhora rekuAmerica rimwechete, ukuwo mutengo wegwaro revavhoti repadandemutande kana kuti electronic copy, uri madhora mazana maviri ekuAmerica.
VaMangwana vanoti pasi pemutemo wenyika, munhe wese ane kodzero yake yekuenda kumatare, saka ikodzero yeERC yekuti iende kumatare.
Facebook Forum