Sangano rinoona nezvezviwanikwa reCentre for Natural Resource Governance kana kuti CNRG yaburitsa gwaro rakanzi “Zimbabwe’s Disappearing Gold; The Case of Mazowe and Penhalonga: rinoti nyika iri kurasikirwa nemari inosvika zana remamiriyoni nemakumi mashanu nemanomwe kana kuti US$157 million pamwedzi nekuda kwehuori.
Mukuru weCNRG VaFarai Maguwu vaudza Studio 7 kuti imwe mari iri kuwanikwa muhuori munyaya yekutengeswa kwegoridhe iri kuendeswa kunotsvagira bato riri kutonga reZanu-PF rutsigiro pamberi pesarudzo dza2023.
Gurukota rezvemari Muzvinafundo Mthuli Ncube negurukota rezvemukati menyika VaKazembe Kazembe vakambotiwo havo nyika inorasikirwa nemari inosvika zane remamiriyoni pamwedzi kana kuti US$100.
Studio 7 haiana kukwanisa kubata gurukota rezvezvocherwa VaWinston Chitando sezvo nharembozha yavo yange isiri kudairwa.
Sezvo tichitema tisina divi ratinorerekera, tabatwo mukuru mubazi rezvekuburitswa kwemashoko VaTafadzwa Mugwadi avao vati handi chokwadi kuti bato ravo riri kuwana mari yekutsvaga rutsigiro kuburikidza nekubiwa kuri kuitwa goridhe munyika. VaMugwadi vati Zanu-PF ine makambani ayo uye vamwe munyika vanoitsigira.
Asi VaMaguwu vanoti mimwe migodhi iri kusiiwa nemamwe makambani makuri munyika yakaita sePenhalonga iri kupihwa vatsigiri veZanu-PF kuti vachere goridhe imwe mari ichiendeswa kubato reZanu-PF.
Vatiwo nyaya yekusanyatsobhadharwa kwemari nekambani yeFidelity Printers iri kupawo kuti vamwe vanhu vaburitse goridhe nemukoto vachiendeswa kunyka dzakaita seDubai.