Mutambo we “Harare Derby” pakati peCaps United neDynamos, uyo waive nemukurumbira, uriko neSvondo asi pasina manyukunyuku ekare.
Mutambo uyu, uyo uri muNational Sports Stadium neSvondo hausi kusimudza manyawi ekare nemhaka yezvikonzero zvakasiyanasiyana.
Makore apfuura mitambo yakadai yaive nyaya svondo rese mudzinzira, mudzimba nemunzvimbo dzekutandarira, mumwe aimbotambira Caps United, Frank Nyamukuta, achiti kwaive kusingadaidzwe anonzwa.
Asi ikozvino mitambo iyi yanaiwa nemvura zvekuti yangove kungoonekwa semimwewo mitambo yemuCastle Lager Premier Soccer League.
Vamwe vanoti zvikwata izvi hazvisisina vatambi vakaita savana Moses Chunga, Edward Katswere, Stanley Ndunduma, Joel Shambo kana Alois Bunjira avo vaisimudza mitambo nezvidavado.
Vamwewo ndivo vanoti zvikwata izvi zvawira pasi mumatambiro azvo sechikwata izvo zviri kudzinga vateveri venhabvu mudzinhandare.
Munyori wezvemutambo wenhabvu Admire Muhimeke anoti Harare Derby yangove zita nemhaka yekudzikira kwaita nhabvu munyika.
Mutambo uyu wauya panguva iyo Caps United yarohwa mumitambo mishanu yakateverana, Dynamos yatadzawo kukunda mumitambo mitatu ichangopfuura.
Dynamos iri pachinhanho chechipiri, Caps United ichitatarika iri pachinzvimbo chegumi nembiri.
Asi Labani Kandi, uyo akapinda pakarenda yama Soccer Star achibatira Dynamos anoti muHarare Derby hamuna zvekuti chikwata chiri kutamba zvakanaka ndechipi.
Dumisani Mpofu, uyo akatora mukombe weligi neCaps United muna 1996 anotsinhirawo achiti mumutambo uyu hamutariswe nhoroondo asi matambiro ezuva iroro.
Vanotevera Dembare neMakepekepe zvakasimba vane tarisiro yekuti mutambo weSvondo uchanakidza kudarika mitambo yeHarare Derby yemakore mashoma achangodarika.
Asi mitambo yePSL iri kusimuka mangwana apo Herentals iri kugashira ZPC Kariba muNational Sports Stadium.
Herentals iri pachinzvimbo chechisere, ZPC Kariba iri pachinhanho chegumi nenhanhatu.
Mimwe mitambo yamangwana yakamira seizvi…
Bulawayo City vs Black Rhinos - Barbourfields, Cranbourne Bullets vs FC Platinum - Sakubva.
Totarisa mutambo wekiriketi
Chikwata cheZimbabwe chiri kupinda munhandare yeHarare Sports Club mangwana mumutambo wekutanga wemitambo mitatu yezuva rimwe neAfghanistan.
MaChevrons ari kugashira vatambi vana vanoti Blessing Muzarabani, Milton Shumba, Craig Ervine naRyan Burl avo vasina kutamba apo Zimbabwe yakanyadzisa nekurohwa neNamibia.
Zimbabwe iri kuda kukunda mumutambo uyu kuti ibve pasi pasi petafura mugungano rezvikwata gumi nezvitatu umo muchabuda zvikwata zvichaenda ku2023 World Cup.
Mitambo yezuva rimwe iyi, iyo iriko musi wa 4, 6 na 9 Chikumi, ine mapoinzi anotambidzwa anokunda muhurongwa hwenzira yekuenda kuWorld Cup uhu.
Zimbabwe yakatadza kubudirira kuenda kuWorld Cup yemuna 2019 asi iri kurwisa kuti iende kumakwikwi a 2023.
Facebook Forum