Mapato makuru ezvematongerwo enyika anoti reZanu PF nCcitizens Coalition for Change, CCC, ane muonero wakasiyana padanho reRussia rekupinda zvine chisimba muUkraine mambakwedza emusi weChina.
Mauto eRussia arwisa guta guru reUkraine reKyiv mambakwedza kusanganisira nemamwe maguta muchiitiko chinonzi nehutungamiri hweUkraine chasiya vanhu vangangosvika makumi mana vaurayiwa. Vanhuwo zvavo vanonzi vari mushishi kuita chipatapata kuedza kubuda munzvimbo dziri kurwiswa neRussia idzi.
Kupinda nechisimba kweRussia muUkraine kunonzi nasachigaro veCCC mudunhu reNorth America, VaTawanda Dzvokora ndihwo hunhu hwenyika dzine hutungamiri hwehumbimbindoga, hwakaita sehwavanoti hunoitwa naVaVladmir Putin.
“Putin ari kuratidza humbimbindoga hwake nekupinda munyika imwe yakazvimirira, a sovereign nation, uchinopaza, uchinorwisa, uninoponda, uchinouraya uchishandisa twunhu twusina nebasa rese. Ndizvo zvatiri kuona zviri kuitwa naPutin,” VaDzvokora vanodaro.
Vanoti hondo iyi ichaunza matambudziko akasiyanasiyana, kwete muUkraine chete, asi kuti munyika dzakawanda pasi rose kusanganisirawo Zimbabwe nekuda kwekukwira kuchaita mutengo wemafuta ekufambisa dzimotokari, izvo zvinozoitawo kuti mitengo yezvimwe zvinhu ikwidzwe.
Nhengo yeZanu PF vari gweta, Doctor Simba Mavaza, vanove gweta, vanoti kunyange vachiwirirana naVaDzvokora kuti hondo yakaipa, Russia ine kodzero yekupinda muUkraine nechisimba.
“Chekutanga chandinoda kuti VaDzvokora vanzwisise ndechekuti Ukraine yakanga iri part yeRussia. Ikaita sahwira weNATO inenge yave kufumura zvakanga zvakavigika mukati meRussia neUkraine. Saka izvo ndizvo zvapa chikonzero chaita Russia isimuke,” Doctor Mavaza vanotsigira maonero avo panyaya iyi.
Vanoenderera mberi vachiti Russia ine kodzero yekuchengetedza zvinhu zvayo zviri muUkraine vachiti ine zvakawanda mumapoka akasiyanasiyana kusanganisira hupfumi hwayo.
Zimbabwe inotenga zvakawanda kubva kuUkraine, zvinosanganisira gorosi nemichina, ukuwo ichitengeserawo Ukraine zvicherwa, kunyange hazvo ichinyanyodyidzana zvayo neRussia.
Mutungamiri weRussia, VaVladmir Putin vazivisa nezvekurwisa kwemauto avo Ukraine vachiyambira dzimwe nyika kuti dzakaedza kuda kupindira dzichasangana nezvadzisati dzamboona muhupenyu hwadzo.
Ukuwo mutungamiri weAmerica, VaJoe Biden, vashoropodza zvikuru kurwiswa kweUkraine neRussia uku, uko vati kwaitika Russia isina kudenhwa.
America nevamwe vainodyidzana navo vari kuronga kudzika zvirango zvakaomarara zvekuomesera Russia pamusoro pezvimwe zvatovepo kare.
Asi vamwe vanoti havaoni zvirango izvi zvichimisa Russia kurwisa Ukraine, sezvo iine shamwari dzimwe dzakaita seChina dzinogona kuibatsira.
Russia iri kuda kuti Ukraine isapinda mumubatanidzwa weNATO, asi vamwe vanoongorora zvematongerwo enyika vanoti Ukraine inofanirwa kuita zvido zvayo sezvo iri nyika inozvitonga.
Facebook Forum