Bato rinopikisa reMDC T inotungamirirwa naVaMorgan Tsvangirai rinoti ratora matanho ekuti mumwe wevatewedzeri vemutungamiri wenyika, VaPhelekezela Mphoko vaburitswe muhotera mavari kugara kubva pavagadzwa pachigaro ichi gore rapera.
Mutauriri weMDC T, VaObert Gutu vanoti bato ravo ranyorera kuhofisi yemutungamiri wenyika nedare remakurukota richinyunyuta nekwarinoti kutambiswa kwemari dzemitero yevana veZimbabwe, panguva iyo zvipatara zvisina mishonga, vashandi vehurumende vachitadza kuwanirwa mari dzemihoro nezvimwe zvakawanda.
VaMphoko vave kusvitsa gore vachigara muhotera yeRainbow Towers muHarare kubva pavakadomwa semumwe wevatevedzeri vaVaMugabe muna Zvita wegore rapera.
Zvinonzi mudzimai waVaMphoko akaramba kutambira dzimba nhatu dzavakanga vanzi vasarudze imwechete yekugara, vachiti hadziwirirane nechidanho chavo.
Vane ruzivo nemitengo yepahotera apa vanoti vanhu vaviri vanorara mumupanda we executive wakafanana neuri kushandiswa naVaMphoko nemhuri yavo vanobhadhara madhora mazana mana nematatu pausiku humwechete vachiwanawo zvakare kudya kwemangwanani.
Svondo rapera vanhu vashanu vakasungwa muharare mushure mekunge varatidzira kusafara kwavo nekuramba vamphoko vachigara parainbow towers iyo nyika ichi tatarika.
VaGutu vanoti vanovimba kuti hofisi yemutungamiri wenyika nedare remakurukota ichaonawo kukosha kwekuchengetedza mari dziri kudikitirirwa nevana veZimbabwe kuti dziendeswe kune mapoka anoda rubatsiro nekukasika akaita sekutengera vanhu chikafu.