Vateveri venhabvu vanoti vava kuisa tarisiro yavo kumaYoung Warriors nemaMighty Warriors sezvo nzira yemaWarriors yasvika mukuguma kuCosafa.
Maroto anga achiita veruzhinji muZimbabwe asvika kumagumo mushure mekunge chikwata che Zimbabwe Warriors chadamburwa 4-1 neNamibia mumakundano eCosafa Senior Challenge.
Zimbabwe yatanga mitambo iyi nekurova Mauritius 2-0 neSeychelles 1-0.
Mumwe anga ane tarisiro kuchikwata ichi ndaVa Edwin Chawasarira avo vaifunga kuti mukombe wave munzira kuuya kuZimbabwe.
Asi mubati wepagedhe wemaWarriors, George Chigova, aive amboyambira kuti vasadherere maBrace Warriors sezvo aive aunza vatambi vane mukurumbira kusanganisira vanotambira zvikwata zvemuAbsa Premiership muSouth Afroca.
Asi iyi yave nhoroondo sezvo vatsigiri venhabvu vave kutarisira mitambo niriko mukupera kwesvondo rino.
MaYoung Warriors ari kusangana neSwaziland mumakwikwi e2015 Africa Youth Championships muRufaro Stadium panguva imwecheteyo maMighty Warriors ari kuZambia uko vari kutamba nemaChipolopolo Queens mumutambo we2016 Olympic Games.
Murairidzi wemaYoung Warriors, Kalisto Pasuwa, anoti vari kutarisira kukunda kunyange hazvo gadziriro yavo yanga isina kumira zvakanaka.
Mumwe mutsigiri wechikwata ichi, VaSavios Dhaka, vanoti vane chivimbo nechikwata chaPasuwa zvekuti vari kuona mukombe wemu Africa uchiuya muZimbabwe.
Zvamira zvakadai, mitambo yeCastle Lager Premier Soccer League iri kuenderera mberi chikwata chiri pamusoro soro cheChicken Inn chakananga kuHwange.
Mimwe mitambo yakamira seizvi:
Chapungu FC Vs Flame Lily FC (Ascot Stadium)
ZPC Kariba FC Vs FC Platinum (Nyamhunga Stadium)
Buffaloes FC Vs Harare City FC (Sakubva Stadium)
Highlanders FC vs Whawha FC (Barbourfields Stadium)
Triangle United FC Vs How Mine FC (Gibbo Stadium.)
Dongo Sawmill FC Vs Caps United FC (Vengere Stadium)
Dynamos iri kutamba neTsholotsho Pirates neMuvhuro sezvo nhandare yeRufaro Stadium iri kushandiswa nemaYoung Warriors.