Muchikamu chedu chatinotarisa zviri kuitwa nevana veZimbabwe vari kunze kwenyika, nhasi tine hurukuro naVaGolden Makusha, avo vari mudunhu reMaryland muno muAmerica.
VaMakusha vakadomwa kuve nhengo yehutungamiri hwesangano rinomirira vemabhizimusi madiki muAmerica, reNational Small Business Association Leadership Council.
Sangano reNSBA ndiro sangano rinonzi rave nemakore akawandisa rinomirira vemabhizimusi madiki mumatunhu ose makumi mashanu emuAmerica, richinzi rinoshanda zvakasimba risina kwarakarerekera.
VaMakusha, avo vanove mutewedzeri wemutungamiri wekambani yeMOGOLG GLOBAL LLC, iyo yavakavamba ivo nemudzimai wavo, Amai Molly Makusha muna 2015, vanoti vakasarudzwa kuburikidza nekucherechedzwa kwavanoitwa semutungamiri wepamusoro mune vemabhizimusi madiki muAmerica.
Vakapinda musangano re NSBA Leadership Council pamwechete nevamwe vemabhizimusi madiki nyika yose uye vachange vachirwira kodzero dzevemabhizimusi madiki kuparamende yeAmerica.
"Ndakaita kudaidzwa nebato iri vachitaura ivo kuti vainga vatarisa nekuona mabasa atinoita kuno kwatinogara kuMaryland nekuTexas kuti tino participator mune ma Chamber of Commerce, tinoshanda nema organization akaita sanaUSAID, Prosper Africa, and nekuno ukuwo, inini I am an election judge wesarudzo dzemuAmerica.
"Saka nema activities iwayo ndakaona vandinyorera kuti unoita zvakawanda, saka tiri kukumbira kuti munge muchishanda nesu muLeadership Council yeNational Small Business Association," vanodaro VaMakusha.
Vanoti kukokwa kwavakaitwa kuti vapinde musangano iri kuchavapa mukana wekuti ivo nevamwe vavo musangano iri vasvitse zvichemo zvevemabhizimusi madiki kune vanhu vakakodzera kunzwa zvinzwa, kunove kudare reCongress.
VaMakusha vanokurudzira vana veZimbabwe, zvikuru vari kunze kwenyika, kuti vasatyira kure pakuzama zvavanoda, uyewo kuti vabatane vachigoverana mazano akasiyanasiyana.
“Zvimwe zvinhu zvinooneka kunge zvinhu zvakaoma zvikurusa sitereki, asi kana munhu wakashinga wakagara wakatarisa in focus nezvimwe zvaunoda kuita pane zvinhu zvinobuda zvinenge zvirimo. Asi patinenge tiri kuita izvi tinenge tichikurudzira kuti ngatibataneyi, tikurudzirane pamwechete kuti munhu wese akwirire kumusoro,” vanodaro vaMakusha.
Kambani yavo yeMOGOLD GLOBAL LLC, iyo inoita mabasa akasiyanasiyana anosanganisira zvemakombiyuta, yakavhurawo mahofisi kuZimbabwe, South Africa neKenya, nechinangwa chekuwedzera kutengeserana pamwe nebudiriro kuburikidza nehunyanzvi hwemakombiyuta, nekupawo mukana kunyika idzi kuti dzikwanise kutengesa zvinhu zvadzo kuAmerica dzichibatsirwa nemutemo weAfrican Growth and Opportunity Act, AGOA.
Vanoda kunzwa zvizhinji pamusoro pekambani yeMOGOLD GLOBAL LLC bayayi apa,https://mogoldglobal.wordpress.com/
Forum