Makundano eCastle Lager Premier Soccer League ave kupinda musvondo repiri maziso ese ari pamurairidzi weDynamos, Paulo Jorge Silva, uyo akonzera mutauro wakanyanya munyika.
Kochii chiri kuitika kuDenamo Dembare?
Vamwe vatsigiri veDynamos vatove kusheedzera kuti Silva ngaasiiswe basa mushure mekuzvamburwa kwakaitwa chikwata ichi neChicken Inn svondo rapera.
Kunyunyuta uku kunogona kuwedzera kana chikwata ichi chikakundwa nemusi weMugovera apo chiri kusangana neTriangle iyo iri kurairidzwa naDavid Mandigora uyo akadzingwa basa kuDynamos mwaka wapera.
Triangle yakakunda Harare City 1-0 mumutambo wayo wekutanga.
Vatungamiri veDynamos vakapa Silva mitambo mina kuti akunde vachiti ivo akatadza anosiiswa basa.
Sachigaro weDynamos, VaKennny Mubaiwa, vanoti ivo zviri mugwara reDynamos kuti murairidzi akatadza basa anodzingwa.
Asi mumwe mutsigiri wechikwata ichi, VaSmart Nyaguse, vanoti Dembare inofanira kupa Silva nguva yekuita basa rake sezvo pari zvino mitambo ichangotanga.
VaNyaguse vanoti sezvo uyu uri mutambo wechipiri mwaka uno havasi kutarisira zvakawanda asi kungotora mapoinzi chete kunyange hazvo zvikasave nemutsindo.
Asi mutambo uri kunyanyotaurwa nezvawo ndeuyo uri kuBarbourfields Stadium pakati pezvikwata zviri kubhebha moto cheHighlanders neche FC Platinum.
Zvikwata zviviri izvi zvakakunda mumitambo yazvo yekutanga, Highlanders yakarakasha Hwange 3-0 panguva imwe cheteyo FC Platinum yakadambura Tsholotsho Pirates 2-1.
Mutsigiri weHighlanders, VaProsper Musiyazviriyo, vanoti Highlanders iri kutora mapoinzi matatu mumutambo uyu.
Chikwata chemaGreen Machine cheCaps United chakananga kuNgezi Platinum Stars uko chinemutoro wakaoma.
Zvikwata zviviri izvi zvakakunda nezvibodzwa 3-0 svondo rapera, Ngezi Platinum Stars ichi dambura Mutare City ukuwo Caps United ichirova Chapungu.
Zvikwata zvakarohwawo nema 3-0 svondo rapera cheHwange neche Chapungu zvirikusanganawo zvekare muAscot Stadium neMugovera.
Zvikwata zvemuBulawayo zviviri cheBulawayo City chirikudamburana nechikwa cheTsholotsho Pirates. Bulawayo City yakatora poindi imwechete mumutambo wavo wesvondo rapera apo Tsholotsho Pirates yakakunndwa neFC Platinum.
Totarisa mumutambo weRugby.
Chikwata chenyika chemaSevens chemaCheetahs chiri kuHong Kong uko chiri kurwira kupinda mugungano rakakosha neHSBC World Series umo mune zvikwata zviviri chete zvemuAfrica, South Africa neKenya.
Chikwata chemaCheetahs chirimugungano rimwechete neGermany, Hong Kong pamwe nemaCayman Islands, gungano iro murairidzi wechikwa ichiBrighton Chivandire anoti harina kunyanyooma.
Chikwata chichapedza chiripamusoro mugungano iri ndicho chinoenderera mberi mumakundano aya.
Chikwata chimwe chete pazvikwata zvisere zvirikukwidza ndicho chinopinda muHSBC World Series.
