Dare ramajisitereti rekuMbare muHarare, nhasi raramba chikumbiro chekuti nyaya iri kupomerwa Muzvare Linda Masarira nevamwe vavo iendeswe kudare repamusorosoro reConstitutional Court kuti zvinoongororwa kuti kodzero dzavo hadzina kutyorwa.
Izvi zvinotevera kusungwa kwavakaitwa mumusha weMufakose kutanga kwemwedzi uno, pakuratidzira kwainge kwakarongwa nechikwata cheTajamuka/Sesijikile Campaign pamwe naPastor Evan Mawarire ve#This Flag.
Mutongi wedare VaStan Mambanje varamba chikumbiro ichi vachiti dare iri rakatonga kare kuti vanhu vakange vaunzwa kudare paine nguva apo vakamira pamberi pedare iri nguva yapfuura.
VaMambanje vati vawona zvichikodzera kuti nyaya iyi isakwidzwe kuConstitutional Court nekuti haina kupikiswa apo vakapa mutongo panyaya iyi.
Nekudaro vati Muzvare Masarira nevamwe vavo vadzoke kudare zvakare musi wa11 Nyamavhuvhu.
Gweta revasungwa ava, VaKudzai Kadzere vaudza Studio 7 kuti havana kufara nemutongo uyu sezvo zviri pachena kuti vanhu ava vakaunzwa kudare pave nemaawa makumi mashanu nematatu vasungwa, asi mutemo uchiti munhu anosungirwa kuuendeswa kudare mukati memaawa makumi mana nemasere asungwa.
Vamwe vaMasarira gumi nevana kusanganisira vana vaviri vechikoro vari kutongwa vachibva kumba asi Masarira ari kutongwa achibva kutirongo sezvo achinzi ane rimwe gwaro rekuti asungwe kana kuti warrant of arrest pane imwe mhosva yaanonzi akapara kwaMutare.
VaKadzere vati dare rarambawo kunzwa chikumbiro chavo chekuti Linda aendeswe kwaMutare kuti vandogadzirisa nyaya yewarrant of arrest iri. Vanoti kana nyaya iyi ikagadziriswa zvinovapa mukana wekuti vabhadhare mari yechibatiso kuti Masarira atongwe achibva kumba.
Zvichakadai vanhu vakawanda kusanganisira vanorwira kodzero dzevanhu pamwe nevezvematongerwo enyika kubva kumapato akasiyana siyana vaungana pamatare amajisitireti ekuMbare vachitsigira Masarira nevamwe vake.
Vamwe vange varipo ndiSenator Lilian Timveous veMDC T vekudunhu reMidlands.
VaHardlife Mudzingwa veTajamuka vati kunyange hurumende ikaramba ichi vasunga Chimurenga chichaenderera mberi kudzamara zvinhu zvanaka munyika.
Vati seTajamuka/Sesijikile, vachapinda mumigwagwa mwedzi unouya vachiratidzira kuti mutungamiriri wenyika VaRobert Mugabe vasiye basa kana vasina kugadzirisa zvese zviri kunetsa munyika.
Vati kunze kwekupinda mumigwagwa vane zvimwe zvirongwa zvakawanda zvavachaita nechinangwa chekuti VaMugabe vasiye basa.
