Accessibility links

Breaking News

Premier Soccer League Yobaka Moto Apo Caps Yotamba neDynamos


Mitambo yeCastle Premier League yave kusvika kwamvura yacheka makumbo paine mutambo wakatarisirwa nevakawanda pakati peCaps United neDynamos.

Mutambo uyu uriko nesvondo muNational Sports Stadium pakati peCaps United, iyo iri kutungamira makundano eCastle Lager Premier Soccer League.

Makepekepe neDembare dziri kupinda mumutambo uyu dziine nhoroondo yakasiyana zvekuti muongorori wezvemitambo vaStanslus Mombeshora vanoti kwakabaka moto.

Caps United ndiyo iri pamusoro pemakwikwi aya nemapoinzi maviri pamusoro peFC Platinum. MaGreen Machine ari kuda kukunda kuti varambe varipachinhanho chavari uyezve kuti vafambe kuenda pedyo nemukombe.

Makepekepe arikuda zvekare kudzokorora Dembare mushure mekukunda 1-0 mumutambo wekutanga kwapera makore akati wandei vachingopunzirwa pasi ne Dynamos.

Kunyange hazvo vanenge vasina Leonard Tsipa na Phineas Bamusi, maGreen Machine ane vatambi vakaita saDominic Chungwa, Tafadzwa Rusike, Ronald Pfumbidzai, naStephen Mwakatuka avo vanokwanisa kuzviita.

VaMombeshora vanoti gore rino ndereMakepekepe. Asi Dynamos yacho haisi yekurovera kuhope. Dembare iri pakaoma zvekuti vatungamiri vechikwata ichi nemurairidzi wavo Lloyd Mutasa vanga varipanguva yakaoma yekunzi ngavaregedze basa.

Kukunda maGreen Machine kunovapa mukana wekupedza ruvengo rwapinda mumba mavo hwakonzerwa nenyaya yekusatora mapoinzi akakwana mumitambo.

Pamusoro pezvo, Dembare irikuda kupedza iri pachinzvimbo chechina mumakundano iwaya saka mapoinzi eCaps United anovabatsira murwendo urwu.

Mutsigiri weDembare VaMordecai Muchongwe vanoti hapana chimwe chavarikutarisira kunze kwehwini.

Vamwewo vari kutarisira kunzwa zvichabuda pamutambo weDembare neMakepekepe ndeve FC Platinum pamwe neve Highlanders avo vakatsikana makumbo neCaps United.

FC Platinum yakasiiwa nemapoinzi maviri asi iri kutamba neNgezi Platinum Stars kuMandava Stadium neMugovera.

Highlanders iyo irikutevera nemapoinzi matatu pasi peCaps United irikusangana neBulawayo City mumusha wayo weBabourfields Stadium.

Mimwe mitambo iriko ndeiyi.

Tsholotsho Pirates v Chapungu

Hwange v Harare City

Triangle v How Mine

Chicken Inn v ZPC Kariba.

Mutare City Rovers v Border Strikers.

XS
SM
MD
LG