Sachigaro weZimbabwe People First mudunhu reMashonaland West Amai Marian Chombo vanoti vaimbova murume wavo, VaIgnatious Chombo vari kufusha mapuriazi akawanda mumaguta ose.
Studio 7 haina kukwanisa kubata VaChombo kuti tinzwe divi ravo sezvo vange vasiri kubatika parunhare. Amai Chombo naVachombo vakarambana muna 2012 mushure mekunetsana mumatare
Mashoko aAmai Chombo anotevera kugunun’una kwenhengo dzebato rinotungamirirwa nevaimbove mutevedzeri wemutungamiri wenyika Amai Joyce Mujuru reZimbabwe People First dzinoti bato reZanu PF ririkuda kukanganisa musangano wavo neMugovera nekuita musangano wavo wekupa nzvimbo dzekuvaka dzimba pedyo nepavakatenderwa kuita musangano wavo.
Amai Marian Chombo vanoti musangano weZanu PF imwe yenzira dziri kushandiswa nebato iri kuvhiringa misangano yavo munyika.
Amai Chombo vanoti izvi hazvisi kuzokanganisa musangano wavo neMugovera. Vaenderera mberi vachiti zvinonyadzisa kuti Zanu PF iri kuda kugovera vechidiki nzvimbo dzekuvaka dzimba ivo vasina mabasa anovapa mari kuti vavake dzimba dzacho.
Izvi zvinotsigirwa nemutungamiri wevechidiki mubato iri VaProsper Gavanga avo vanoti zviri pachena kuti vechidiki vachatadza kuvaka dzimba mumakore maviri anotevera vozotorerwa nzvimbo idzodzo mushure mesarudzo dzemuna 2018.
VaGavanga avo vaimbove nhengo yevechidiki mubato reZanu PF vanoti manyepo kuti vechidiki vachapiwa nzvimbo dzekuvaka dzimba sezvo vakambovimbiswa nzvimbo idzi musarudzo dzemuna 2013.
VaGavanga ndivo vaitungamirira vanhu vaikokera rutsigiro rwaVaPhilip Chiyangwa veZanu PF avo vakakundwa naVaPeter Matarutse veMDC-T musarudzo yemuna 2013.
Amai Chombo vanoti mapurisa angadai asina kubvumira bato reZanu PF kuita musangano wavo pedyo nepavanenge vari sezvo zvichikurudzira mhirizhonga.
VaChiyangwa vabvuma kuti vakavimbisa kupa vechidiki nzvimbo dzekuvaka dzimba asi hazvina kuitika sezvo kanzuru yeChinhoyi isati yagadzira migwagwa nekuisa mapombi emvura panzimbo yakasarudzwa kuShackleton.
Mukuru wevechidiki muZanu PF muChinhoyi VaTapiwa Chitate vanoti vagara vaine hurongwa hwavo hwekupa nhengo dzavo dzechidiki nzvimbo dzekugara sezvakataurwa nemutungamiri wavo varizve mutungamiri wenyika vaRobert Mugabe.
Asi meya veChinhoyi vaTest Michaels vanoti hapana chavarikuziva panyaya iyi asi vanoti varikungonzwa kuti zvakataurwa pamusangano weZanu PF neMugovera.
Asi vanoona nezvematongerwo enyika vanoti igaroziva kuti bato reZanu PF rinoda kukanganisa misangano yemamwe mapato.
