Mutungamiri webato rinopikisa reZimbabwe People First Amai Joyce Mujuru vari kutarisirwa kuita musangano kuSakubva Stadium, kwaMutare nemusi weMugovera.
Asi musangano uyu wapa kuti makwikwi eManicaland Road to Fame wange uchida kuitwa unorongwa neDelta Beverages ne National Arts Council umbosendekwa parutivi.
Mutungamiri webato rinopikisa reZimbabwe People First Amai Joyce Mujuru vari kutarisirwa kuenderera mberi nemisangano yavo kuSakubva Stadium nemusi weMugovera.
Amai Mujuru vakatoita misangano kuBulawayo, muHarare nekuMasvingo. Mutauriri webato iri VaRugare Gumbo vanoti misangano iyi yakanangana negadziriro yecongress yebato ravo ichasarudza vatungamiri. Vatiwo vari kufara nematambirirwo avari kuitwa.
Asi amai Mujuru vari kushorwawo zvakanyanya nevebato reZanu-PF vachitungamirwa nemudzimai wemutungamiri wenyika Amai Grace Mugabe. Asi VaGumbo vati havashamisike nezviri kutaurwa nevanhu veZanu-PF
Zvichakadaro, matambo weChibuku Road to Fame wange uchida kuitwa musi mumwe chete uyu wambomiswa nekuda kwemusangano uyu. Vanoona nezvekufambiswa kwemashoko muNational Arts Council kwaMutare VaAlexander Tunzi vatenda kuti vamanikidzwa kumbosendeka parutivi makwikwi aya.
“Makwikwi edu eChibuku Road to fame haachabudiriri nekuda kwekuti mapurisa atiti nemusi uyu kuchange kuine chiitiko cehezvematongerwo enyiki ukuwo isuwo vezvemitambo netsika tinezveduwo, “ vakadaro VaTunzi. Vaenderera mberi vachiti, “Saka mapurisa aya akatikurudzira kuti tisvage musi wekuita mutambo wedu nekuti tinenge tiri pedo napedo kuti Sakubva Stadium neChinyausunzi Beerhall.”
VaTunzi vanoti mutambo uyo wave kuzoitwa kutanga kwemwedzi unotevera.
“Takazotaurawo nevamwe vatinoshandidzana navo veDelta Beverages tikabvumirana kuti tave kuzoita mutambo uyu msi wa-6 August tingori nezvikwata zvedu Nine zvinoridza misambo yakasiyana-siyana. Nzvimbo yatichaitira hauna kushanduka asi musi ndiwo washandurwa chete.”
Vaenderera mberi vachiti zvikwata zvichakwikwidza musi wa 6 Nyamavhuvhu izvi zvinoridza misambo yemimhanzi yakasiyana-siyana.
“Tine vakomana veNice to Nice vanoridza musambo wechinyakare, vamwe vanoridza Passada, vamwe vanoridzawo musambo weSungura zvichingodaro,” vakadaro VaTunzi
Makwikwi eChibuku Road to Fame aripo kusimudzira hunyanzvi muzvikwata zvevechidiki mumitambo yakasiyana-siyana munezvemagitare. Makwikwi enyika yose achange achizoitwa musi wa 24 Gunyana kuHarare.
