Vatambi vemaWarriors vavimbiswa mari kana vakakunda mumitambo yavo mitatu yekutanga yeAfrica Nations Championships muGroup D mavari kuRwanda
Vatambi ava vavimbiswa madhora zviuru gumi ekugovana kana vakakunda Zambia mumutambo wavo wekutanga uyo uri muUmuganda Stadium muguta reRubavu neChipiri masikati.
Mutungamiri weZimbabwe Football Association, VaPhillip Chiyangwa, vanoti mitambo yese mitatu yekutanga ichange ine zviuru gumi pamutambo wega wega zvichipa vatambi ava zviuru makumi matatu.
VaChiyangwa vanoti mari ichapamhidzirwa kana vatambi ava vakakwanisa kusvika kuma kota fainari.
Sekutaura kwaVaChiyangwa mari iyi yakatambidzwa maneja wemaWarriors, VaShariff Mussa, avo vakapihwa basa rekugovanisa vatambi ava mari iyi kana vachinge vakunda sezviri kudiwa.
Mubati wehomwe wechikwata chemuPremier Soccer League cheCaps United, VaMorton Dodzo, vanoti zvaitwa neve Zifa izvi zvinofadza zvikuru sezvo zvichipa maWarriors shungu dzekukunda.
MaWarriors akasvika muRubavu neMugovera murairidzi wechikwata ichi, Kalisto Pasuwa, achiti iye ari kufara nemabatirwo avari kuitwa pavari kugara.
Kunyange hazvo pasina kundengendeka sezvinowanzoitwa kana kuchitambwa maAfrica Cup of Nations veruzhinji vari kutarisira kuti maWarriors achasimudza mureza weZimbabwe kumakundano aya.
Mumwe wavatsigiri venhabvu, VaZivanai Muroyiwa, vanoti pamberi nemaWarriors.
Kubvira musi wa 7 Chikumi, 1980, Zambia neZimbabwe dzasangana mumitambo inokwana makumi mana neina.
Pamitambo iyi Zimbabwe yakakunda mumitambo gumi nemishanu, Zambia ikabudirira kanomwe. Mimwe mitambo makumi maviri nemiviri yakapera iri mangange.
Kunze kweZambia, zvimwe zvikwata zviri mugungano re Group D iMali neUganda
VaMuroyiwa vanoti Mali neUganda hadzimire pamaWarriors vachiti ivo zvikwata izvi zvichadamburwa damburwa nemaWarriors.
Asi muongorori wezvemutambo wenhabvu, VaMisheck Chisaga, vanoti maWarriors asadherere Mali neUganda sezvo mutambo wasanduka zvikuru
Zimbabwe ichatamba neMali musi wa 23 Ndira, yozitamba zvakare neUgunda musi wa 27 Ndira.
Mitambo yose iyi ichatambirwa muUmuganda Stadium muguta reGisenyi.
Zvikwata zviviri kubva mugungano iri ndizvo zvinobudirira kuenda kumakota fainari.