Vanhukadzi vemuZimbabwe vanoti hupenyu hwavo hauna kushanduka zvakanyanya kunyange hazvo munyika mava nehurumende yemubatanidzwa.
Vanotiwo sevanhukadzi, ndivo vari kusangana nematambudziko anokonzerwa nemhirizhonga yezvematongerwo enyika.
Izvi zvakabuda muongororo yakaitwa nemasangano anosanganisira International Centre for Transitional Justice, Women’s Coalition of Zimbabwe, Research and Advocacy Unit nemamwe.
Gwaro iri rinonzi Women, Politics and the Zimbabwe Crisis, raburitswa neChitatu.
Gwari iri rinotiwo mutungamiri wenyika, VaRobert Mugabe, vane masimba akawandisa muhurumende yemubatanidzwa kudarika mutungamiri wehurumende, VaMorgan Tsvangirai.
Ongororo iyi inotiwo mutevedzer wemutungamiri wehurumende, VaArthur Mutambara, havana kana masimba zvawo muhurumende iyi.
Mukuru anoona nezvezvirongwa musangano re Research and Advocacy Unit, Muzvare Kudakwashe Chitsike, vanoti ongororo yavo yakatarisawo zvinofungwa nevanhukadzi pamusoro pezviri kuitika muhurumende yemubatanidzwa.