Mutungamiri wenyika, VaRobert Mugabe, nemusi weChina vakatoresa mhiko vanhu vashanu veMDC inotungamirwa naVaMorgan Tsvangirai, kuva makurukota, uye vatevedzeri vemakurukota, zvichitevera kudomwa kwavo naVaTsvangirai neChitatu.
Vatoreswa mhiko ava ndiVaTapiwa Mashakada, gurukota idzva rezvekurongwa kwehupfumi, VaObert Gutu, mutevedzeri mutsva wegurukota rezvemitemo, mutevedzeri mutsva wegurukota remigodhi, VaGift Chimanikire, gurukota idzva muhofisi yaVaTsvangirai, VaJameson Timba, uye mutevedzeri mutsva wegurukota rezvevechidiki, VaTongai Matutu.
VaTsvangirai vakadoma vanhu ava nemusi weChitatu mushure mekudzorera kumabasa ebato mamwe makurukota ebato ravo, ayo anosanganisira munyori anoona nezvekufambiswa kwemabasa ezvematongerwo enyika, Engineer Elias Mudzuri, pamwe nevange vari gurukota rezvedzimba, VaFidelis Mhashu.
VaTsvangirai vanoti vadzorwa kubato vane basa guru rekusimbaradza bato reMDC. Asi vamwe vanoti zvakaitwa naVaTsvangirai zvinoratidza kuti MDC yava zinyekenyeke.
