Komiti yeparamende inoona nezvehutano inoti iri kushushikana nemashoko ekuti dunhu re Manicaland harina majekiseni ekubaya vana BCG inodzivirira rurindi kana kuti tuberculosis.
Vana vari kuberekwa munzvimbo zhinji muManicaland, kusanganisirawo Mutare General Hospital, havasi kubaiwa jekiseni renhomba iri zvinova zvakaita kuti sangano re Zimrights ripindire kuti hurumende igadzirise nyaya iyi.
Madzimai ari kusununguka kwaMutare anoti ari kuendeswa kumba vana vasina kubaiwa. Va Blessing Chebundo inhengo yekomiti yehutano muparamende. Va Chebundo vati komiti yavo ichange ichisangana panotanga dare reparamende kugara mumavhiki maviri kuti vawongorore nyaya iyi.
