Dare repamusosoro munyika re Constitutional Court rinoti chikumbiro chakasvitswa kudare iri nenhengo dzeMDC Renewal Team makumi maviri neimwe dzakadzingwa muparamende chinofanirwa kunzwikwa nekukasika.
Mukuru-mukuru wevatongi munyika, kana kuti Chief Justice, Va Godfrey Chidyausiku, vatura mutongo wekuti chikumbiro chakasvitswa kudare nenhengo dzeMDC Renewal Team dzakadzingwa muparamende chinzwikwe nekukasika sezvo zuva resarudzo dzechipiri dzekutsviva nhengo idzi rakatotarwa nemutungamiri wenyika, Va Robert Mugabe, sezvinodiwa pamutemo.
Va Mugabe vakazivisa mu Government Gazette neChishanu kuti sarudzo dzechipiri dzekutsvaga nhengo dzeparamende dzichatsiva nhengo dze MDC Renewal Team idzo dzakadzingwa muparamende mushure mekunge MDC-T yanyora tsamba kuti nhengo dzakange dzisisiri mubato ravo dzichaitwa musi wa 10 Chikumi.
Va Mugabe vakazivisawo zvakare kuti dare richatambira mazita evachakwikwidza musarudzo idzi richagara musi wa 16 Chikumi.
Nokudaro, Va Chidyausiku vati vawona zvakakodzera kuti chikumbiro chakasvitswa kudare naVa Tendai Biti nevamwe vavo chekuti mutongo wakaturwa nemutauriri weparamende, Va Jacob Mudenda, usendekwe parutivi chinofanira kunzwikwa musi wa 14 Kubvumbi dare richatambira mazita evari kuda kukwikwidza musarudzo idzi risati ragara.
Magweta anga akamirira Va Mudenda abvumawo mudare kuti nyaya iyi inofanirwa kunzwikwa nechimbi uye Va Mudenda, mumapepa avo emhinduro kuchikumbiro ichi, vanoti vakatevedzera mutemo pavakadzinga Va Biti nevamwe vavo muparamende.
Asi Va Biti nevamwe vavo vanoti haivaifanirwa kudzingwa muparamende sezvo vachiti pane gakava rekuti mutungamiri weMDC-T chaiye ndiyani zvichitevera kumbomisa basa mutungamiri webato iri, Va Morgan Tsvangirai, pamusangano wakaitwa gore rapera ku Mandel Training Centre muno mu Harare.
Asi Va Tsvangirai nevamwe vari muchikwata chavo vakazogarawo pasi vakadzinga Va Biti mumusangano uye vanoti Va Biti nevamwe vavo havasisiri nhengo dzebato ravo sezvo vakavamba rimwe bato ravava kushanda pamwechete naVa Welshman Ncube ravari kudaidza kuti United Movement for Democratic Change.
Mune imwewo nyaya, nyaya yakakwidzwa kudare iri nevaimbova mumiriri we Headlands muparamende, Va Didymas Mutasa, pamwe nevambova mumiriri we Hurungwe West muparamende, Va Themba Mliswa, yekuti mutongo wakaturwa naVa Mudenda wekuvadzinga muparamende usendekwe parutivi, yakatarisirwawo kunzwikwa mangwana.
Va Mutasa naVa Mliswa vakadzingwa muparamende zvichitevera tsamba yakanyorwa nevanowona nezvekufambiswa kwemabasa mu Zanu PF, Va Ignatious Chombo, yekuti vaviri ava vamire kumirira nzvimbo dzavanga vachimirira muparamende.
Izvi zvinotevera kudzingwa kwakaitwa vaviri ava mu Zanu PF asi Va Mutasa vanoti hapana munhu ane kodzero yekuvadzinga muZanu PF sezvo vachiti vose vakasarudza pakongiresi vakasarudzwa nekongiresi isina kufambiswa zviri pamurawu webato ravo.