Accessibility links

Breaking News

Maonero eHurumende yeAmerica

America Yozvipira Kushanda neAfrica Kupedza Kupararira kweChirwere cheMalaria

Mashoko anotevera anotaura pamire hurumende yeAmerica pakupedza chirwere chemalaria chinokonzerwa nehumhutu muAfrica.

Chirwere chemalaria chave nemakore akawanda uye chiri chekutanga pazvirwere zvinouraya vanhu vakawanda pasi rose.

Chirwere ichi chakawanikwa muhumhutu kana kuti mosquito yakafa makore mamiriyoni makumi matatu kana kuti 30 million. Asi chirwere ichi chinonzi chakazotanga kupararira zvakanyanya makore zviuru gumi kana kuti 10, 000 apera apo vanhu vakatanga kugara mumaguta, kuchengeta zvipfuyo uye kurima.

Mumakore ano, chirwere ichi chinobata vanhu vanodarika mamiriyoni mazana maviri gore rega rega uye vanhu zviuru mazana mana kana kuti 400,000 vanofa nechirwere ichi gore roga roga zvikuru muAfrica.

Kubva muna 2005 pakaparurwa hurongwa hwemutungamiri wenyika yeAmerica kana kuti US President’s Malaria Initiative hwekurwisa chirwere ichi, America yatungamira muhurongwa uhu kuburikidza nebazi rezvekudyidzana nedzimwe nyika re U.S. Agency for International Development kana kuti USAID.

Chirongwa chemutunbamiri wenyika yeAmerica ichi chabatsira kuti chirwere ichi chisatapurirwe kuvanhu vanodarika bhiriyoni imwe chete nechidimbu kana kuti 1.5 billion uye kudzivisa kufa kwevanhu nemalaria vanodarika mamiriyoni manomwe nezviuru mazana matanhatu kana 7.6 million.

Musi wa 6 Gumiguru, America yakaparura hurongwa hwemakore mashanu hwakanangana nekupedza chirwere chemalaria.

Izvi zvinobatsirawo hurongwa hwekuti vanhu mamiriyoni mana vasafe nechirwere ichi uye kuti vanhu bhiriyoni imwe chete vasabatwa nacho panosvika gore ra2025.

Chirongwa chekupedza malaria nechimbi chimbi chine zvinangwa zvitatu, Chekutanga kwaive kudzikisa huwandu hwevanofa nechirwere ichi nezvikamu makumi matatu nematau kubva muzana muna 2025 munyika dzine dambudziko rechirwere ichi rakakurisa.

Chikamu chechipiri kudzikisa chirwere ichi nezvikamu makumi mana kubva muzana munyika dzakatarisana nechirwere ichi zvakanyanya. Chikamu chekupedzisira America inoda kupedza dambudziko rechirwere ichi zvachose munyika gumi dzairi kubatsira. America inoti zvinokwanisika kuzadzikisa zviga zvose izvo sezvo ikozvino kwave nenhomba yekurapa malaria.

Musi wa 6 Gumiguru World Health Organization yakaparura nhomba yekutanga yekudzivirira malaria. Vanokokera mabasa muchirongwa chemutungamiri weAmerica chekurwisa malaria, Dr Raj Panjabi vanoti iyi ndiyo nhomba yekutanga ichabatsirawo vana kuti vasafe nemalaria muAfrica. Vanoti nyika makumi mana dzabudirira kupedza zvachose chirwere chemalaria ichi.

Dr Panjabi vanoti kunyangwe pachiine mutoro wekupedza chirwere ichi zvachose pasi rose, kurwisa chirwere ichi kuchabatsirawo kurwisa zvimwe zvirwere zvinopararira pasi rose zvichauya.

Mashoko aya anotaura pamire hurumende yeAmerica pakurwisa chirwere cheCovid-19 muAfrica. Maaverengerwa neni Blessing Zulu ndiri muWashington DC.

See all News Updates of the Day

America Yotemera Zvirango Vakuru veZvikwata Zvinopfurikidza Mwero muAfrica

Chikwata cheAl-Shabab chichiita zvidzidzo zvehondo muMogadishu.

Lieutenant General Scott Berrier vanotungamira bazi rezvekusora mubazi rezvekudzivirirwa kwenyika muAmerica kana kuti U.S. Army Director of the Defense Intelligence Agency vanoti dambudziko revanopfurikidza mwero riri kuramba richinetsa muAfrica sezvo paine zvikwata zvinodyidzana vezvikwata zvakaita Al Qaida neIslamic State zvakawanda.

Zvikwata zvakaita secheAl Shabaab zvinodyidzana neAl Qa’ida zviri kukonzera kusagadzikana kumabudazuva kweAfrica. Lieutenant General Scott Berrier vakayambira kuti zvikwata zvakaita seJama’at Nusrat al-Islam wal Muslimin kana kuti JNIM, zviri kukanganisa zvakanyanya kumawirira kweAfrica uye chikwata cheISIS kuMozambique chapawo kuti vakawanda vaende muhupoteri.

Bazi reAmerica rinoona nezvekudyidzana nedzimwe nyika reState Department rinoti pane vanhu vashanu vave kuzivikanwa kuti vanotungamira zvikwata zvinopfurikidzwa mwero izvi vaiswa pazvirango kana kuti Specially Designated Global Terrorist pasi pechikamu cheExecutive Order 13224, chakavandudzwa.

Vanhu ava vanoti Bonomade Machude Omar anozivikanwa nekuti, Abu Sulayfa Muhammad na Ibn Omar vanotungamira chikwata cheISIS kuMozambique.

Vamwe vakatemerwa zvirango ndi Sidanag Hitta, anozivikanwa nekuti Abu Qarwani na Abu Abdelhakim al-Kidali vari kutungamira chikwata cheJama’at Nusrat al-Islam wal Muslimin kudunhu reKidal kuMali.

Salem Ould Breihmatt anozivikanwa nekuti Abu Hamza al-Shanqiti na Hamza al-Mauritani vanotungamira vanopfurikidza mwero mudunhu reMopti kuMali.

Ali Mohamed Rage anozivikanwa nekuti Ali Dheere anova mutauriri weal-Shabaab anombotungamira nyaya dzehutororo mu Kenya ne Somalia atemrwawo zvirango.

Midziyo yose yevanhu ava munyika dzinodyidzana neAmerica ichatorwa uye zvizvarwa zveAmerica hazvibvumidzwe kudyidzana navo.

Munyori mukuru mubazi rezvekudyidzana nedzimwe nyika VaAnthony Blinken vanoti America yakazvipira kuvhara nzira dzose dzinoshandiswa neISIS-Mozambique, JNIM, neAl-Shabaab sezvo zvose zviri zvikwata zvakaiswa pazvirango kana kuti Foreign Terrorist Organizations and Specially Designated Global Terrorists nechinangwa chekuona kuti hazvirambe zvichikonzera rufu rwevanhu.

Asi VaBlinken vanoti kuti zvikwata izvi zvisarambe zvichidzika midzi kumawirira, mabudazuva kana kuchamhembe kweAfrica zvinoda mushandirapamwe pakati penyika dzose.

America Inotemera Zvirango Vasori Vana vekuIran

VaAntony Blinken

America yatemera zvirango panhengo dzevasori vehurumende yeIran zvichitevera kupomerwa mhosva kwadzakaitwa negweta rekuchamhembe kwedunhu reNew York, iro rakati vasori vana ava vakaedza kubvuta mugari weAmerica kuti vamuendese zvechisima kuIran.

Munhu wavakaedza kubvuta ndiMasih Alinejad, mutori wenhau akazvarirwa kuIran asi ave mugari wemuAmerica.Alinejad murwiri wekodzero dzavanhu, anoshora zvikuru hurumende yeIran uye anechirongwa chaanokokera panhepfenyuro yeVoice of America.

Gurukota reAmerica rinoona nezvekudyidzana nedzimwe nyika, VaAntony Blinken, vanoti zvakaedza kuitwa nevasori vekuIran ava zvinotyora mitemo yepasi pose yekudyidzana kwenyika, vachiti America inoona kuti Iran inoda kushungurudza zvimwe zvizvarwa zveAmerica, kusanganisa vashandi vehurumende neavo vaimboshandira hurumende yeAmerica.

Vasori vana vakatemerwa zvirango ava vakuruvakuru mubazi revasori muIran, vanosanganisa Alireza Shahvaroghi Farahani, uyo anotungamira bazi revasori rine vamwe vasori vatatu vatemerwavo zvirango neAmerica, vanoti Mahmoud Khazein, Kiya Sadeghi, naOmid Noor.

VaBlinken vanoti chikwata chevasori ichi hachina kutumwa kuzobvuta mutori wenhau uyu chete, asi zvizvarwa zveIran zvisingawirirani neIran zvinogara muUnited Kingdom, Canada, nekuUnited Arab Emirates.

Vasori vana ava vanonzi vanoita basa sekutumwa kwavanenge vaitwa nebazi rehurumende yeIran rinoona nezveruzivo nekuchengetedzwa kweIran, kana kuti Ministry of Intelligence and Security (MOIS), iro rinonyanya kutyiwa nevanhu muIran. Bazi reMOIS rakatemerwavo zvirango neAmerica.

Bazi reAmerica rinoona nezvemari, reUnited States Treasury Department, rinoti MOIS inoitira hurumende yeIran basa guru mukutyora kodzero dzevanhu veIran, richitizve kudzvanyirirwa kwezvizvarwa zveIran zviri muIran nekunze kwenyika, kwakaita sekuEurope nekune dzimwe nyika, kuri kuitwa neMOIS.

Kutemerwa zvirango kwaitwa vasori vana ava kunorevavo kuti zvose zvavanazvo muAmerica hazvisisiri mumaoko mavo uye hapana munhu ari muAmerica anobvumidzwa kuita zvemabhizimisi navo uye mabhanga nemamwe makambani anoitabasa rezvemari vachatemerwavo zvirango kana vakafambisa mari yevasori vana ava.

VaBlinken vanoti America haizoregi vatori venhau vachityisidzirwa kana kunyaradzwa, vachiti America ichaona kuti vanoita izvi vanosungiswa.

VaBlinken vanoti America haidi kuona kurwiswa kwezvizvarwa zveAmerica muAmerica kana kunze kweAmerica.

please wait

No media source currently available

0:00 0:03:30 0:00
Pekupinda Napo Kuti Muone Zvamuri Kuda

America Yoshora Kupondwa kweVatori veNhau muRussia

Mutungamiri weRussia VaVladimir Putin

Mashoko anotevera anotaura pamire hurumende yeAmerica pane zviri kuitika muRussia.

America inoti muna Chikunguru uno iri kurangarira nekupa ruremekedzo kuvatori venhau vaviri Natalia Estemirova na Paul Klebnikov avo Vakapondwa muna 2004 na 2009.

Vaviri ava vange vakazvipira mukuita basa ravo uye kurwira kodzero dzevanhu uye huori.

Klebnikov aive nemumwe mubereki kubva kuAmerica uye ainge ari mupepeti mukuru weForbes Russia Magazine rinotarisa nyaya dzezvehupfumi uye aizivikanwa nenyaya dzekufumura huori hwaiitwa nevemabhizimisi vemuRussia.

Musi wa 9 Chikunguru, 2004, Klebnikov akapfurwa kapfumbamwe muMuscow, guta guru reRussia panze pehofisi yake.

Estemirova aizivikanwa nenyaya dzekurwisa kodzero dzevanhu muGrozny guta guru reChechnya ,

Sangano raaishanda naro rinorwira kodzero dzevanhu reMemorial Human Rights Center rakaunganidza humbowo hwevanhu vaipambwa nekupondwa muChechnya muna 1999 apo vairirwira rusungunuko kubva kuRussia.

Mutori wenhau uyu akafumura nyaya dzekuurayiwa kwevanhu pasina kutongwa kumatare. Vamwe vevanhu ava vaipisirwa dzimba vamwe vachikandwa mujeri vasina mhosva.

Estemirova aishanda nemumwe mutori wenhau wekuRussia, Anna Politikovaskaya airwirawo kodzero dzevanhu nekushora hurumende ye Russia uye naiyewo akapondwa muguta reMuscow muna 2006.

Muna 2007, Estemirova akave mutori wenhau wekutanga kupihwa mubairo weAnna Politkovskaya Award unopihwa mudzimai anorwira kodzero dzevanhu gore roga roga.

Kusvika parizvino hapana ati asungwa achipomerwa mhosva dzekuponda Klebnikov na Natalia Estemirova.

Gurukota rinoona nezvekudyidzana nedzimwe nyika muhurumende yeAmerica VaAntony Blinken mumashoko kuvatori venhau vanoti vanhu vakaronga nekuuraya vatori venhau ava havasati vaendeswa kumatare kunotongerwa mhosva dzavakapara uye mhirizhonga nekutyisidzira vatori venhau zviri kuenderera mberi muRussia.

America inoshora hurumende yeRussia zvikuru nekutyora kodzero dzevatori venhau uye inomira nevatori venhau vari kumbunyikidzwa ava.

VaBlinken vanoti Estemirova naKlebnikov vachagara mundangariro dzevakawanda kwemakore akawanda nehushingi hwavo mukurwira kodzero dzevanhu uye kurwisa huori muRussia.

Mashoko aya anotaura pamire hurumende yemuAmerica pane zviri kuitika muRussia.

America Yokurudzira Kuti Vatori veNhau Vasambunyikidzwa Vachiita Basa Ravo

VaAntony Blinken

Mugwaro ravakabudisa, mutevedzeri wemukuru wemapurisa eFederal Bureau of Investigation (FBI), VaWilliam Sweeney, vakati chikwata chinotsigirwa nehurumende yeIran chakaedza kubvuta mutori wenhau anogara muAmerica kuti vamudzorere zvechisimba kuIran.

Mutori wenhau uyu ndiMuzvare Masih Alinejad, akazvarirwa kuIran asi ave mugari wemuAmerica.

Kwemakore mazhinji, Alinejad akashanda semutori wenhau muIran, izvo zvakakonzera kuti hurumende yeIran ishatirwe naye pamusoro pezvaakange achibudisa pachena.

Kubva zvaatiza kubva kuIran muna 2009, Alinejad ave nemukurumbira pa’social media’, paanogara achishora kumanikidzwa kwevanhukadzi muIran kuti vashandise jira rekuvhara misoro yavo, kana kuti hijab.

MuAmerica, Alinejad anechirongwa chaanokokera panhephenyuro yeVoice of America.

Mutauriri wemuzinda weWhite House, Amai Jen Psaki, vakashora Iran mukuronga kubvuta Alinejad, vachiti Iran inoda kunyaradza manzwi eavo vanoshanda murugare muIran nekune dzimwe nyika.

Muongororo inonzi ‘2021 World Press Freedom Index’, yakaitwa nekunyorwa nesangano rinorwira kodzero dzevatori venhau, reReporters Without Borders, Iran iri pachinzvimbo chezana nemakumi manomwe nechina (174) kubva munyika zana nemakumi masere (180) dzinobvumira vatori venhau kushanda vakasununguka.

Sangano iri rinoti, mukudzvanyirira vatori venhau, hurumende yeIran inoshandisa nzira dzechisimba, dzinosanganisira kuvabvunzurudza, kuvaisa mumajeri kana kuvauraya.

Sekutaura kwakaitwa negurukota reAmerica rinoona nezvekudyidzana nedzimwe nyika, VaAntony Blinken, Iran haisi iyo nyika yega inoshungurudza nekumbunyikidza vatori venhau.

VaBlinken vakati hofisi iri mubazi ravo yakabudisa zvayakawana muongororo yayakaita, inonzi Human Rights Report, inotatidza kuti vatori venhau vazhinji varikumbunyikidzwa nekuurairwa basa ravo.

Sangano rinorwira kuchengetedza kwevatori venhau, reCommittee to Protect Journalists, rinoti muna 2020, huwandu wevatori venhau vakaurayirwa kuita basa ravo hwakapetwa kaviri, richiti vatori venhau vazhinji vakaurawa muMexico neAfghanistan.

Sangano iri rinotivo huwandu hwevatori venhau vakasungirwa kuita basa ravo mugore ra2020 hwakasvika pahusina kumbosvika kubva zvavatanga kuongorora kunetseka pabasa kwevatori venhau, richiti vazhinji vevatori venhau vakasungwa muPeople’s Republic of China, Turkey, nemuEgypt.

Mushure mekuziviswa kuti Iran yakange yaedza kumubvuta muAmerica, Masih Alinejad akataura pfungwa dzevatori venhau pasi pose achiti haazoregi kuita basa rake, sezvo zvese zvirikuitika kwaari zvichimusimbaradza.

VaBlinken vanoti chokwadi chinobudiswa nevatori venhau chinobatsira mukuvaka hurumende dzejekerere, vachitizve vanokurudzira hurumende dzepasi pose kuti dzichengetedze vatori venhau uye kuti dzione kuti vatori venhau vanoita basa ravo pasina njodzi.

please wait

No media source currently available

0:00 0:04:14 0:00
Pekupinda Napo Kuti Muone Zvamuri Kuda

Rodhai zvimwe

XS
SM
MD
LG