Accessibility links

Breaking News

Dare reI-C-C Rozeya Chikumbiro Chekuti VaBashir Vasungwe


Vachuchisi vedare reInternational Criminal Court, kana kuti ICC, vapomera neMuvhuro mutungamiri weSudan, VaOmar al Bashir, mhosva yekuurayisa vanhu vakawanda, mhosva dzehondo, pamwe nemhosva dzekutyora kodzero dzevanhu muSudan.

Muchuchisi mukuru wenyaya idzi, Va Luis Moreno-Ocampo, vaudza dare kuti Va Bashir vaitungamira hurongwa hwekubatwa chibharo kwevanhukadzi, kupondwa kwevanhu, uye kubudiswa nechisimba kwemamwe marudzi munzvimbo dzavaigara.

VaMoreno Ocampo vakumbirawo vatongi vatatu vedare iri, kuti vapihwe mvumo yekusunga VaBashir, kuitira kuti vasauraye vamwe vanhu vari mudunhu re Darfur, umo mune chikwata che Janjaweed, icho chiri kushandiswa naVaBashir mukuponda vanhu kuchamhembe kwe Sudan.

Mazuva mashoma apfura, dare re ICC rakasunga vaimbova mutungamiri wevapanduki ku DRC, Va Jean Piere Bemba, avo vari kupomerwa mhosva yakafanana neyaVa Bashir.

Kana VaBashir vakasunga nedare iri, vachava mutungamiri wenyika wechitatu kusungwa achiri muhutongi, zvichitevera kusungwa kwaVa Charles Taylor veku Liberia, pamwe naVaSlobodan Milosevic vekuYugoslavia.

VaGabriel Shumba igweta rinorwira kodzero dzevanhu, uye vari Executive Director ve Zimbabwe Exiles Forum.

Ntungamili Nkomo weStudio7 aita hurukuro naVaShumba kuti tinzwe kuti zviri kuitwa ne ICC zvinorevei kuvatungamiri venyika vakaita saVaMugabe avo vari kunzi vamiswewo pamberi pedare iri sezvo vaurayisa vanhu vakawanda.

Dzimwe Nhau Kubva kuStudio7...

XS
SM
MD
LG