Munyori anoona nezvekuburitswa kwemashoko muZanu-PF, Doctor Nathan Shamuyarira, vanoti bato ravo riri kuzotangisa sarudzo dzemaprimaries kune dzimwe nzvimbo dzakaita mutauro.
VaShamuyarira vanoti sezvo sarudzo dzakaitwa nechimbi chimbi, panogona kunge pakakanganiswa. Musangano wakaitwa neChipiri neZanu-PF, unonzi wakaburitsa pachena kuti hapachina kuwirirana mubato, uye pakakandiranwa makobvu nematete.
Vamwe mubato iri vachitungamirwa naVaShamuyarira, vaiti vakapinda musarudzo vasina makomborero ebato ngavadzingwe, asi vamwe vachitungamirwa naVaDidymus Mutasa, avo vanoona nezvekufambiswa kwemabasa, uye VaElliot Manyika, vanoona nezvematongerwo enyika, vaiti sarudzo dzidzokororwe sezvo vainge vasingadi kuti vapatsanure mavhoti muMasvingo nedzimwe nzvimbo dzakaita seMashonaland East neManicaland kwakanyoreswa nevamwe vainge vakundwa musarudzo.
Vamwe vakaramba kuterera bato vanosanganisira gurukota rezvehupfumi, VaSamuel Mumbengegwi, nhengo yePolitiburo, VaDzikamai Mavhaire, nevamwe.
VaDewa Mavhinga igweta uye vari Deputy Director weZimbabwe Human Rights NGO Forum vaudza mutori wenhau Blessing Zulu weStudio 7 kuti Zanu-PF haina zvayaita sezvo kusawirirana kuchaenderera mberi.