Mupepeti weStandard, VaNevanji Madanhire, vasungwa nemapurisa neChipiri uye vacharara muhusungwa.
VaMadanhire vasungwa nemapurisa epaHarare Central Police Station pavaenda negweta ravo kukamba iyi, VaChris Mhike, mushure mekunzwa kuti vanga vachitsvagwa nemapurisa.
VaMadanhire vasungirwa nyaya yakabuda mubepanhau ravo yekuti vakuru vakuru vemapurisa vakanga vava kupa basa vaimbove varwiri vehondo yerusununguko uye vakasiya chipurisa.
Nyaya iyi yakanyorwa nemutori wenhau weStandard, Nqobani Ndlovu, uyo akasungwawo mumasvondo maviri apfuura akagara mutirongo kwemazuva gumi kuKhami Remand Prison muBulawayo.
Ndlovu akaburitswa mutirongo neChishanu mushure mekubvisiswa mari yechibatiso.
VaMhike vanoti vari kutarisira kuti VaMadanhire vamiswe pamberi pedare neChitatu.