Dare repamusoro ratura mutongo wekuti kambani yeTelecel Zimbabwe imboramba ichishanda gakava rayo nehurumende richigadziriswa.
Mutongi wedare repamusoro, Va Nicholas Mathonsi, vatura mutongo uyu zvichitevera chikumbiro chakaitwa neTelecel Zimbabwe.
Va Mathonsi vati vachazopa zvikonzero zvavo zvizere muzuva ravasina kutara pavatura mutongo uyu mumahofisi avo.
Telecel Zimbabwe yakasvitsa chikumbiro kudare repamusoro chekuti ibvumidzwe kushanda zvichitevera kukanzurwa kwakaitwa rezenesi nePost and Telecommunications Regulatory Authority of Zimbabwe kana kuti Potraz.
Potraz iri kupomera Telecel mhosva yekusatevedza mutemo wenyika.
Va Mathonsi vatiwo Potraz isave nechekuita nezvenyaya ye Telecel kudzamara Telecel yapedzerana negurukota rinowona nezvehumhizha mukufambiswa kwemashoko, Va Supa Mandiwanzira.
Hatina kukwanisa kutaura naVa Mandiwanzira kuti tinzwe divi rehurumende zvichitevera mutongo uyu sezvo nharembozha yavo yanga isiri kudairwa.
Mutauriri weTelecel Zimbabwe, Va Francis Chimanda, varamba kutaura nezvenyaya iyi neStudio 7 vachiti vatora danho sekambani kuti vasazeye nyaya iyi nevatori venhau.
Zvichakai, mumwe mugari wemu Harare uye ari muzvinabhizimusi anoshandisa nhamba dzeTelecel Zimbabwe, Va Emmanuel Marara, vanoti vafara zvikuru nemutongo waturwa nedare uyu.
VaMarara vashorawo hurumende nekuda kuvharisa kambani ye Telecel vachiti vanhu vazhinji vanogona kurasikirwa nemabasa izvo zvinhu zvisina kumira zvakanaka munyika munyaya dzezvehupfumi.
Mumwe anoshandisawo nharembozha yeTelecel, Va Martin Musevenzi, avo vanoita basa rekuhodha zvinhu vachitengesa, vanoti vanhu vazhinji vanga vave kuziva nhamba dzavo dzeTelecel zvekuti dai dare raramba kupa Telecel mvumo yekuti ienderere mberi nebasa, hupenyu hwaizovaomera zvikuru.
Kambani ye Telecel Zimbabwe ndiyo kambani yechipiri munyika pakukura inoita zvembozhanhare, uye inoti ine vanhu mamiriyoni maviri nemazana mashanu ezviuru vanoshandisa mbozhanhare dzayo munyika.
Kambani yeTelecel Zimbabwe ikambani yakaumbwa nekambani yekunze yeTelecel Globe pamwe neEmpowerment Corporation yavana muzvinabhizinesi vemuZimbabwe.
Telecel Globe ine zvikamu makumi matanhatu kubva muzana zvemari muTelecel Zimbabwe, ukuwo Empowerment Corporation iine zvikamu makumi mana kubva muzana.
Telecel Globe iri pasi pekambani yeOrascom Telecom Company, iyo ine manhizinesi mu Africa, Europe, Asia, Middle East ne North America.