Rimwe remasangano anomirira vadzidzisi munyika re Progressive Teachers Union of Zimbabwe, kana kuti PTUZ, rinonzi ratsemuka nepakati zvichitevera kusawirirana.
Sangano iri rinonzi ratsemuka nepakati zvichitevera kubuda kwedzimwe nhengo musangano revadzidzisi iri idzo dzinoti dzatowumba rimwe sangano rinomirira zvido zvevadzidzisi.
Va Wilson Makanyaire, avo vaive nhengo ye PTUZ, vanoti sangano ravo idzva riri kudaidzwa kuti Progressive Professional Teachers Union of Zimbabwe.
Vanotiwo kubuda kwavo mu PTUZ kwakakonzerwa nemunyori mukuru musangano iri, Va Raymond Majongwe, avo vavari kupomera mhosva yekushanda ne Zanu PF.
Va Makanyaire, avo vaimbotungamira PTUZ ku Manicaland, vanoti Va Majongwe vave kutungamidza zvido zve Zanu PF pamberi vachisiya zvido zvevadzidzisi vari munyika yose avo vavanoti vari kudya nhoko dzezvironda.
Studio 7 yaedza kutaura naVa Majongwe kuti tinzwe divi ravo panyaya iyi asi nharembozha yavo yanga yakadzimwa muswere wese.
Asi mutungamiri we PTUZ, Va Takavafira Zhou, vanoti VaMakanyaire havana kumbogara vari muhutungamiri hwePTUZ, uye munhu akabatsirwa ne PTUZ apo ainge ava kuda kudzingwa apo aidzidzira kuva murairidzi.
VaZhou vatiwo vanoshuvira VaMakanyaire rakanaka muhupenyu hwavo nesangano ravo, vachiti PTUZ haisi kuzofa yakapatsanurwa sezvo nhengo dzayo chaidzo dzicharamba dzichiremekedza sangano ravo.
Va Makanyaire, avo vakafanobata chigaro chemutungamiri weProgress Professional Teachers Unions of Zimbabwe vati sangano ravo ratonyoreswa kuhurumende uye vanoti ratove nenhengo dzakawanda munyika yose.
Vaenderera mberi vachiti sangano ravo riri kuda kuti vadzidzisi vatambiriswe mari iri pamusoro pemadhora chiuru nemazana maviri. Pari zvino vadzidzisi vari kutambira mari iri pasi pemadhora mazana mashanu.
Sangano rinomirira vashandi munyika re Zimbabwe Congress of Trade Unions riri kukurudzirawo hurumende kuti itambirise vashandi mari iri pamusoro pe poverty datum line.
Zvichakadai, Va Makanyaire vati vachakurudzira kuti vadzidzisi varamwe mabasa pakutanga kwegore rinouya kana hurumende isina kuwedzera vadzidzisi mari yavanotambira pachaparurwa hurongwa hwekushandiswa kwemari yegore rinouya kana kuti bhajeti.
Gurukota rezvemari, Va Patrick Chinamasa, vakatarisirwa kutura bhajeti regore rinouya mwedzi unouya.
