Accessibility links

Breaking News

Vamwe Vatsigiri veZanu PF Vanoratidzira kuChipinge South


Vanonzi vari kutungamira zvikwata muZanu PF VaEmmerson Mnangagwa nemutewedzeri wemutungamiri wenyika, Amai Joice Mujuru
Vanonzi vari kutungamira zvikwata muZanu PF VaEmmerson Mnangagwa nemutewedzeri wemutungamiri wenyika, Amai Joice Mujuru

Vamwe vevakarwa hondo yerusunguko pamwe nevatsigiri vebato reZanu PF vangangosvika mazana matatu vanonzi vaungana panzvimbo yemabhizimusi yeChecheche kuChipinge South vachiratidzira vachiramba hutungamiri hwemumiriri wavo mudare reparamende, VaEnock Porusingazi.

Vaona zvichiitika uye vari mukuru wesangano revechidiki rePlatform for Youth Development, VaClaris Madhuku, avo vanga vari paChecheche, vanoti mhomho iyi yanga iine zvinyorwa zvinonyomba VaPorusingazi pamwe nekuita maslogan anonyomba mutevedzeri wemutungamiri wenyika, Amai Joice Mujuru.

NeSvondo vamwe vatsigiri veZanu PF pamwe nevanonzi vakarwa muhondo yerusununguko vanonzi vakakanganisa musangano wekutsvaga nhengo dzeCentral Committee yebato iri waiitirwa kuBindura, kuMashonaland Central, mushure mekunge chikwata ichi chapinda zvechisimba mumusangano uyu chichinyomba pamwe nekuda kurwisa gurukota rezvevashandi, VaNicholas Goche.

Bepanhau reDaily News rinoti VaGoche vakatozopona nekutiza kubva mumusangano uyu, uye vanonzi vakabva vazivisa kuti havachakwikwidzi nekuda kwemhirizhonga iyi.

VaGoche naVaPorusingazi vanonzi vanotsigira Amai Mujuru. Vari kuita hurongwa hwekuratidzira ava vanonzi vari kutsigira chikwata chinotungamirwa negurukota rezvemitemo, VaEmmerson Mnangagwa.

VaMnangagwa naAmai Mujuru vanoramba kuti vane zvikwata zvavari kutungamira kunyange hazvo politiburo yebato iri yakati ichaumba komiti inoferefeta nyaya yezvikwata izvi zviri kurwira masimba.

KuMasvingo zvinonzi musangano wekutsvaga vachaenda kukongiresi wakakanganiswa zvakare nemhirizhonga mushure mekunge zvikwata zviri kurwira masimba izvi zvanetsana.

Studio7 yakundikana kubata VaPorusingazi kanawo VaGoche kuti tinzwe mativi avo panyaya iyi.

Hurukuro naVaClaris Madhuku
please wait

No media source currently available

0:00 0:01:33 0:00
Pekupinda Napo Kuti Muone Zvamuri Kuda

XS
SM
MD
LG