Chikwata chenhabvu chine mukurumbira cheDynamos chasaririra mumakundamo eCastle Lager Premier Soccer League mushure mekuita mangangemukupera kwesvondo.
Maimbiro aiita vatsigiri veDynamos vachikuzirira kuti chikwata chavo chikunde Harare City mumutambo kunhandare yeRufaro hakuna kubatsira chikwata ichi sezvo zvikwata zviviri izvi zvakagumisira zvaita mangange 0-0.
Kuimba uku kwaiitira kupa simba kuchikwata cheDynamos kuti chikunde mushure mekunge zvikwata zvachiri kukwikwidzana nazvo zveChicken Inn neFC Platinum zvakunda mumitambo yazvo neMugovera.
Chicken Inn yakadambura How Mine 2-1 ukuwo FC Platinum ikarova WhaWha.
Mangange eDynamos neHarare City akasiya vave nemapoinzi matanhatu pasi peChicken Inn uyezve mapoinzi maviri pasi peFC Platinum.
Izvi hazvisi kufadza vatsigiri vechikwata ichi mumwe wavo VaZebron Sikwela vachiti pavo papera mukurwira mukombe weligi uyo vakatora kwemakore mana apfuura.
Muongorori wenhabvu VaJames Mukoki vanoti semaonero avo mukombe weligi nezviuru zana zvemadhora zvananga kumusha weChicken Inn.
Asi izvi zvingangosanduka svondo rinotevera apo Chicken Inn iri kusanga neFC Platinum.
Mumwe muongorori wezvemutambo wenhabvu VaFarai Kambamura vanoti mutambo uyu wakatsvuka ropa sezvo pasina chikwata chirikuda kudonhedza poindi pazvikwata zviviri izvi panguva ino.
FC Platinum yave nemwedzi mishanu pamwe nemitambo yeligi gumi nemitanhatu isati yakundwa.
Chikwata ichi chakapedzisira kurohwa musi wa10 Chivabvu apo chakarohwa neDynamos.
Asi izvi hazvisirizvo zviri mumusha wemagreen machine eCaps United.
Kufara uku kwakadzimurwa apo green machine yakatambisa hutungamiri hwechibodzwa chimwechete ndokurohwa 2-1 neZPC Kariba.
Vatsigiri veCaps United vakabuda munhandare yeNyamhunga vakanyarara kuti mwii kudarika ruzha rwavanga vachiita kubvira Lloyd Chitembwe zvaakatora basa rehurairidzi kubva kuna Mark Mathe.
Zvakabuda mumutambo uyu zvaunza kunyemwerera kumeso kwaSunday Chidzambwa sezvo zvakabatsira chikwata chake kubva mugungano rezvikwata zvingangoenda kuDivision One gore rinouya.
Mimwe mitambo yeCastle Lager Premier Soccer League yakapera sezivi.
Buffaloes 0 Tsholotso Pirates 0
Triangle 0 Flame Lilly 3
Hwange 1 Chapungu 0
Highlanders 2 Dongo Sawmills 0
Totarisa mutambo wekiriketi, chikwata chenyika chekiriketi chakawedzera mufaro mumusha mushure mekudambura vari kushanya veIreland nemawiketsi mashanu neSvondo ndokukunda mumitambo mitatu yezuva rimwe 2-0.
Mutambi Craig Ervine ndiye akashura mare achiteverwa naSean Williams uyo akarovawo maranzi makumi mana nematatu
Kunyange Zimbabwe ikakundwa mutambo wasara vatotora kare mukombe wemakundano aya.
