Sangano rinorwira kodzero dzevatori venhau kuchamhembe kweAfrica reMISA-Zimbabwe rakabatana nevamwe vatori venhau, neChitatu rasvitsa kudare repamusorosoro reConstitutional Court, magwaro ekuti mutemo unosvibisa chimiro chemunhu wecriminal defamation uraswe mubumbiro idzva remitemo.
Mumagwaro asvitswa kudare negweta riri kumirira sangano iri pamwe nevatori venhau ava, VaChris Mhike, vanoti chikamu 96 chemutemo wecriminal law (Codofication and Reform) Act (Chapter 9:23) uri kunze kwemutemo sezvo usingadyidzane nezvikamu 61 ne 62 zvebumbiro remitemo, nekudaro unofanirwa kuraswa.
VaMhike vanoti zvikamu 61 ne 62 zvebumbiro idzva izvo zvinochengetedza kodzero dzevanhu mukufambiswa kwenhau pamwe nekuwaniswa mashoko pamwe nekodzero dzekutaura vakasununguka.
Vamwe vakwira dare pamwe neMISA-Zimbabwe vatori venhau vanoti Nqaba Matshazi, Sydney Saize pamwe naGodwin Mangudya, pamwe nevanoita zvekudhinda mapepa vakazvimirira VaRoger Dean Stringer.
Matshazi naVaStringer vanonzi vakamboshungurudzwawo nemutemo uyu.
Vakwirirwa dare vanoti gurukota rezvemitemo nemabasa eparamende uye vari mumwe wevatevedzeri vemutungamiri wenyika, VaEmmerson Mnangagwa, gurukota rezvekuburitswa kwemashoko VaJonathan Moyo pamwe negweta guru rehurumende VaPrince Machaya.
Vatatu ava vane mazuva gumi ekupikisa nyaya iyi.
Danho iri rinouya panguva shoma dare rimwechetero ratonga kuti mutemo wecorminal defamation uchiri kushanda sezvo wakangobviswa chete pabumbiro remitemo rekare.
