Accessibility links

Breaking News

Vaimbove Sachigaro weZanu PF muHarare VaAmos Midzi Vanoshaya


VaAmos Midzi
VaAmos Midzi

Vaimbove gurukota rezvemhando dzemoto uye vakambomiswa kuve nhengo yebato reZanu PF, VaAmos Midzi, vawanikwa vakafa vari mumotokari yavo kupurazi ravo reMarirangwe riri kuBeatrice, kunze kweguta reHarare.

Vataura vakamirira mhuri, vanove muzukuru wekwaMidzi uye vari nhengo yeCentral Committee yeZanu PF, VaCornellius Bwanya, vanoti semhuri havasati vave kukwanisa kutaura nezverufu urwu sezvo vasati vapihwa ongororo iri kuitwa nemapurisa.

Asi mashoko aburitswa nemapepanhau anosanganisira The Herald anoti VaMidzi vawanikwa vakafa vakagara kumashure mumotokari yavo, iyo inonzi yanga yakakiyiwa.

Mapurisa anonzi atozoita zvekupwanya fafitera remotokari kuti vakwanise kuvhura kuti vakwanise kutora mutumbi waVaMidzi.

Kiyi dzemotokari, idzo dzinonzi dzanga dzashaikwa, dzinonzi dzazowanikwa dzakaiswa pasi pekapeti yemumotokari iyi.

Mumotokari umu munonzi mawanikwawo mapiritsi asati azivikanwa kuti ndeeyi. VaMidzi vanonzi vanga vaine mari inosvika mazana maviri nemakumi masere emadhora nemadhora maviri muhomwe dzavo.

Mutauriri wemapurisa, Senior Assistant Commissioner Charity Charamba, vati vanga vasingakwanisi kutaura nesu panguva yatafona sezvo vanga vari mumusangano.

VaMidzi vakambovewo mumiriri weZimbabwe kuAmerica vasati vaitwa gurukota rezvemigodhi nezvicherwa, uye gurukota rezvemhando dzemoto.

Vakazosarudzwa kuve sachigaro weZanu PF mudunhu reHarare, chigaro chavakanga vakabata kusvika gore rino pavakazomiswa kuve nhengo yebato kwemakore mashanu vachipomerwa mhosva yekuve mumwe wechikwata chinonzi chinotsigira Amai Joice Mujuru.

Studio 7 yaedza kunzwawo kubva kune vakashanda naVaMidzi uye vari vakafanobata chigaro chasachigaro weZanu PF mudunhu reHarare, VaGodwills Masimirembwa, asi vati havasati vave kukwanisa kutaura nezvenyaya iyi kusvika vemhuri vataura.

VaMidzi vakaberekwa musi wa 4 Chikunguru mugore ra 1952 uye vanga vave nemakore makumi matanhatu nemaviri ekuberekwa.

please wait

No media source currently available

0:00 0:01:20 0:00
Pekupinda Napo Kuti Muone Zvamuri Kuda

XS
SM
MD
LG