Accessibility links

Breaking News

MDC yaVaWelshman Ncube Inobvisa paChigaro VaMzila Ndlovu


VaWelshman Ncube
VaWelshman Ncube

National standing committee yebato reMDC inotungamirirwa naVaWelshman Ncube yakasangana mukupera kwesvondo yakasunga kuti vakafanobata chigaro chemunyori mukuru webato iri, VaMoses Mzila Ndlovu vabve pachigaro ichi.

Mutauriri webato iri, VaKurauone Chihwayi vanoti bato ravo harina kugutsikana nemafambisirwo anga achiitwa basa naVaMzila Ndlovu, kusanganisira kukundikana kwavo kushevedzera misangano.

Vanoti VaMzila Ndlovu vakakundikana kwazvo kugadzirira musangano mukuru webato iri wekongiresi uyo uri kutarisirwa kuitwa mukupera kwegore rino, pamwe nezvimwe zvipomerwa zvakawanda.

Vanoti bato ravo ratodoma vanga vari mutewedzeri waVaMzila Ndlovu Amai Miriam Mangwende-Mushayi kuti vabate chigaro ichi kusvika pavachaita sarudzo dzizere.

“Izvozvi ndichitaura nemi kudai Amai Mangwende-Mushayi vatotanga kurova ndima kuita basa ravo,” vanodaro VaChihwayi.

Asi VaMzila Ndlovu vaudzawo Studio 7 kuti kunyange hazvo vasati vatambira tsamba inovabvisa pachigaro, vari kuitawo zvekunzwa nevedzinhau.

Vanoti vatambira danho ratorwa nebato ravo, zvichireva kuti vasiya chigaro chemunyori mukuru webato ichi, asi vacharamba vari nhengo yebato reMDC.

VaMzila Ndlovu vanoti vanofunga kuti chikonzero chakaita kuti vabviswe pachigaro ichi inyaya yekuti ivo nedzimwe nhengo dzebato ravo vakanga vanyorera tsamba kumutungamiri webato VaNcube vachida kuti vasiye chigaro vachiti vari kutadza kutungamira musangano.

Asi VaChihwayi varamba mashoko aya vachiti havasati vatambira tsamba inonzi yakanyorerwa VaNcube naVaMzila Ndlovu nevamwe vavo iyi.

please wait

No media source currently available

0:00 0:02:05 0:00
Pekupinda Napo Kuti Muone Zvamuri Kuda

XS
SM
MD
LG