Meya weguta reMasvingo VaHubert Fidze vari kuramba mashoko ari kubva kusangano revagari vemuguta ravo reMasvingo Residents Trust ekuti havasi kuteerera kurudziro kubva kuvagari panyaya yekugadzirwa kwebhajeti regore rinouya.
Vamwe vagari kubva kuWard One neWard Two muguta reMasvingo vanonzi vakatoramba kupinda mumisangano yekuzeya bhajeti rekanzuru iri vachinzi vainyunyuta nekufambiswa kwemabasa nekanzuru iyi.
Vamwe vagari vanonzi vaishevedzera vari panze pemusangano uyu vachiti kusapinda kwavo mumusangano yaive nzira yekuratidza kunyunyuta kwavo nekusatambirwa kwepfungwa dzavo nekanzuru mumakore apfuura.
Mumwe mukuru musangano revagari iri, VaProsper Tiringindi vanoti sevagari havaoni zviine musoro kuti kanzuru itenge dzimwe motokari asi iyo ine dzimwe dzakabatwa nechikonzi nekuda kwezvikwereti zvine kanzuru.
“Isu tiri kuti panzvimbo yekutenga dzimwe motokari, madii mashandisa mari yacho kutsikinura dzakabatwa nechikonzi idzi,” vanodaro VaTiringindi.
Asi meya weguta iri VaPfidze vanoti havana chavanoona chakapotswa nekanzuru yavo mukuita kwayo basa, vachiti kutaura zveguhwa zvinoti netseyi.
“Nyaya iyi iri kwaSheriff inyaya iri kuma court inove yandisina simba rekuti tingataura nezvayo ,” vanodaro VaFidze.