Gurukota rezvemari, Va Patrick Chinamasa, vanoti vari kufara nebasa riri kuitwa pasi pechirongwa che Macro-Economic Financial Management Institute of Eastern and Southern Africa.
Vachitaura pamusangano wechirongwa ichi neMuvhuro muWashington DC, VaChinamasa vati chirongwa che Macro-Economic Financial Management Institute of Eastern and Southern Africa (MEFMI) chave nemakore makumi maviri chichishanda nenyanzvi dzehupfumi dzemunyika dzemuAfrica.
MEFMI ine nhengo dzinobva munyika gumi nenhatu dzemu Eastern and Southern Africa.
Vachitaurawo pamusangano uyu, mukuru weMEFMI muZimbabwe, Dr Caleb Fundanga, vatiwo sangano ravo riri kufara nehukama hwaro neZimbabwe, uye mahofisi avo ari munyika iyi.
VaFundanga vaudza musangano uyu kuti vanoshandawo nemamwe makambani akazvimirira mumabasa avanoita.
Gavhuna vebhanga guru renyika, Va John Mangudya, avo vange vari pamusangano uyu, vanoti sangano re MEMFI riri kubatsira nyanzvi dzakawanda dzemuAfrica nekuvapa ruzivo kuburikidza nezvirongwa zvedzidziso zvavari kuita nenhengo dzavo dzinosanganisira banga ravo.
Musangano uyu uchazeyawo zvimwe zvipindaidzo zviri kusanganikwa nenyika dzemu Africa mukuzadzisa zviga zveMEMFI.
Musangano uyu uri kuitwa pamberi pemisangano mikuru yepagore yeWorld Bank ne International Monetary Fund muWashington DC.
