Pange pane mufaro mukuru muguta reGweru apo vatepfenyuri venhepfenyuro dzehurumende nedzinoshanda dzakazvimirira dzega vatepfenyura vari muguta reGweru senzira yekucherechedza zuva reWorld Radio Day.
Zuva iri iro rinocherechedzwa pasi rose musi wa13 Kukadzi gore rega rega range richicherechedzwa pasi pedingindira rinoti "Youth and radio."
Mumwe weavo vataura pagungano iri, Tamuka Mugaviri, uyo anove gurukota redunhu reMidlands muparamende yevechidiki, ati rhedhiyo chinhu chakakosha zvikuru muhupenyu hwevanhu sezvo ichikwanisa kufambisa mashoko kuvanhu vakawanda munzvimbo dzakasiyana-siyana kusanganisira dzimwe dzinonetsa kusvika.
Tamuka anoti vechidiki vanoshuvira kuti nhepfenyuro dzakasiyana-siyana munyika dzitepfenyure zvidzidzo zvevana vechikoro sezvaimbochiitwa makore apfuura.
Mumwe mudzidzi wezvekutapa nhau paHarare Polytechnic, Tariro Zvizhinji, uyo ange aripowo pachiitiko ichi, ati zvakaksoha kuti vechidiki wapiwe mukana wekuve panhepfenyuro dzakasiyana-siyana kuitira kuti vawane mukana wekutaura zvinhu zvakanangana nevechidiki.
Mumwewo munhu ange aripowo pachiitiko ichi, uyo angozvidoma nezita rekuti Edna, atsinhirawo izvi akakurudzira kuti venhepfenyuro vatepfenyure nyaya dzakanangana nematambudziko anosangana nevanasikana.
Gurukota rezvekufambiswa kwemashoko, VaJonathan Moyo, vange vakatarisirwa kuvepo pachiitiko ichi asi havana kuuya. VaIvanhoe Gurira vanove munyori mubazi iri ndivo vange vakamirira vaMoyo.
VaGurira vati hurumende iri mushishi rekuona kuti ipe marezinesi kune vakanyorera kupiwa marezinesi aya kubazi reBroadcasting Authority of Zimbabwe.
Vatiwo hurumende iri kuita zvose zvainogona kuti nyika ive yave kuwanisa masai-sai edigital musi wa15 Chikumi wakatarwa nesangano reInternational Telecommunications Union kuti nyika dzose dzinge dzave kushandisa masai-sai aya usati wasvika.
Mumwe mugari wemuGweru, VaDenford Gushungo, avo vange varipowo pachiitiko ichi vati hurumende inofanirwa kuita zvose zvainogona kuti munyika muve nenhepfenyuro dzakawanda.
Mudzidzisi weMedia Studies paMidlands State University, VaNhamo Mhiripiri, vati vanobvuma kuti zvakakosha kuti munyika muve nenhepfenyuro dzakawanda kusanganisira maCommunity Radio asi vati zvakakoshavo kuti veruzhinji vadzidziswe kuti nhepfenyuro dzakadai dzisazoshandiswa nenzira inogona kuunza mhirizhonga munyika.
Mumiriri weUNESCO muZimbabwe, Amai Peggy Boateng, vati dingindira rekuti Youth and Radio rakasarudzwa mushure mekuona kuti huwandu hwevanhu vechidiki hunopfuura zvikamu makumi mashanu kubva muzana pasi rose uye zvakakosha kuti pfungwa dzavo dzinzwikwe.