Mamaneja maviri akadzingwa basa kukambani yeZuva Petroleum akatadza kubudirira kudare reSupreme Court anoti ave kuenda kudare repamusoro soro reConstitutional Court , ConCourt.
Mamaneja akadzingwa basa aya anoti VaDon Nyamande naVaKingston Donga.
Zvichitevera mutongo wedare reSupreme Court, vashandi vakawanda vari kurasikirwa nemabasa sezvo makambani ava kudzinga vashandi pamadiro.
Mamaneja maviri aya ainge ati kambani yeZuva Petroleum yaityora mitemo yezvevashandi inopa zvikonzero zvekuti munhu anodzingwa basa seyi.
Asi dare rakatenderana nekambani iyi zvakapa kuti mamwe makambani achitange kugumura vashandi.
Gweta revashandi veZuva Petroleum vakadzingwa basa, Muzvinafundo Lovemore Madhuku, vanoti vane chivimbo chekuti vachabudirira kudare reConcourt.
Gweta rakamirira kambani yeZuva Petroleum, VaInnocent Chagonda, vanoti havaone havo VaMadhuku vachibudirira kuConCourt.
Mune zvine chekuita nemotongo wanetsa uyu, dare remakurukota rakasangana neChina rakatenderana kuti mutemo uvandudzwe nechimbi chimbi.
Pakapera musangano uyu, gurukota rezvevashandi, Amai Prisca Mupfumira, vakati hurumende yainge yatenderana kuvandudza zimwe zvikamu zvemutemo weLabour Act. Hurumende yakumbira vemakambani kuti vamire kudzinga vanhu mabasa.