Accessibility links

Breaking News

VaMugabe Vanoita VaJonathan Moyo Gurukota reDzidzo yePamusoro


Mutungamiri wenyika, VaRobert Mugabe, neMuvhuro vakavandudza zvishoma dare ravo remakurukota vachibvisa VaJonathan Moyo kubazi rezvekuburitswa kwemashoko, vachivaita gurukota rinoona nezvedzidzo yepamusoro.

Vanga vari gurukota redzidzo yepamusoro, Amai Oppah Muchinguri Kashiri, vava gurukota rezvemvura nezviwanikwa. Vatora basa ranga richiitwa naVaSaviour Kasukuwere, avo vava gurukota idzva rezvematunhu, vachitora basa ranga richiitwa naVaIgnatius Chombo.

VaChombo vava gurukota rezvemukati menyika, vachitora basa ranga richiitwa naVaKembo Mohadi, avo vatora basa raiitwa nevakadzingwa mubato, VaDidymus Mutasa, avo vanga vari gurukota rezvevasori.

Brigadier General Ambrose Mutinhiri vave kutora chigaro chaVa Joel Biggie Matiza chekuva gurukota rezvedunhu reMashonaland East. VaMatiza havana rimwe basa idzva ravapihwa.

Amai Nyasha Chikwinya ndivo vava gurukota rezvemadzimai.

Gurukota rezvevashandi, Amai Priscah Mupfumira, ndivo vari kufanobata chigaro chegurukota rezvekuburitswa kwemashoko zvichitevera kubviswa kwaVaMoyo.

Amai Mupfumira vanoti vachabata chigaro ichi kusvika VaMugabe vatoresa gurukota idzva mhiko.

Hurukuro naAmai Priscah Mupfumira
please wait

No media source currently available

0:00 0:01:14 0:00
Pekupinda Napo Kuti Muone Zvamuri Kuda

Vanoona nezvekuburitswa kwemashoko muMDC, VaObert Gutu, vanoti zvaiitwa naVaMugabe kungopedzera hoko padehwe retsindi sezvo dare ravo remakurukota risina njere dzekunyukura nyika mumadhaka mairi.

Mukuru wesangano reZimbabwe Democracy Institute, VaPedzisayi Ruhanya, vanotiwo VaMoyo kwavaenda kuchavapa mukana wekuvandudza zvinhu munyaya dzedzidzo, vachitiwo hapana zvavanotarisira zvitsva kuhurongwa hwaitwa naVaMugabe.

VaRuhanya vanoti munhu anofanirwa kuvandudzwa ndivo VaMugabe pachavo, kwete zvavari kuita pamakurukota avo..

Hurukuro naVaPedzisayi Ruhanya
please wait

No media source currently available

0:00 0:01:46 0:00
Pekupinda Napo Kuti Muone Zvamuri Kuda

XS
SM
MD
LG