Vatsigiri vechikwata cheMutare City Rovers icho chichangobva kusimudzirwa kupinda muzvikwata zvepamusoro soro zvenhabvu munyika muCastle Lager Premier Soccer League, vari pamutambara kede nemafaro sezvo chikwata chavo chinenge chotashurana nezvikwata zvakaita seChicken Inn, Highlanders, Dynamos nezvimwe mumwaka wenhabvu gore rinouya.
Chikwata cheMutare City Rovers, icho chakakwatura Ruwa United 2-0 neSvondo, chakabudirira mushure mekunge chimwe chikwata chachaikwikwidzana nacho cheMasvingo United chemudunhu reEastern Region, chakaita mangange zero-zero nechikwata cheMutoko Traders neSvondo kunhandare yeChikondoma kwaMutoko kwakare.
Vatsigiri ava vari kunyanya kufara sezvo vacharamba vachiona nhabvu yepamusoro mushure mekunge chikwata chemauto cheBuffaloes chakadzikisirwa kuenda kuDivision One svondo rapera.
VaGarikayi Chitukutuku mugari wemaMutare uye vanofarira nhabvu vachitsigira Mutare City Rovers. VaChitukutuku vanoti vanonzwa manyukunyuku nechiitiko ichi uye vanovimba kuti vatsigiri pamwe chete nevagari vemuguta vachatsigira chikwata ichi pose panoda rutsigiro.
Mumwe mugari wemaMutare, VaSherphard Kaputeni, vanoti havana kana mashoko akawanda nekuda kwemufaro wavanawo nekupinda muPremier Soccer League kwechikwata chavo chinozivikanwa nerekuti Magusha.
Mumwe mutsigiri weMagusha, VaAmos Mwayi, vanoti vane chikumbiro chekuti vatsigiri venhabvu kwaMutare varambe vakamira nechikwata cheMutare Rovers kuitira kuti varambe vachiwana mukana wekuona zvikwata zvose zvepamusoro munyika zvichivashanyira muguta ravo.
Mumwe mugari zvakare wemumusha weSakubva pedyo nenhandare yeSakubva iyo ichange ichishandiswa nechikwata ichi, VaKevin Masingita, vanoti hapana Kirisimasi bhokisi inopfuura chiitiko ichi kuvagari veguta reMutare mwaka uno.
Murairidzi weMutare City Rovers, VaKennedy Kachara, vanoti chikwata chavo chauya zvachose muzvikwata zvepamusoro munyika panyaya yezvenhabvu, uye havazi kuzonyadzisa nekuita zvemahumbwe.
Kunyange hazvo kanzuru yeguta reMutare yakasangana nematambudziko ekushayikwa kwemari yevashandi, uye kuita mamwe mabasa ekufambisa zvinodikanwa zvineukoshi, meya weMutare, VaTatenda Nhamarare, vanoti hapana chinotadzisa kuti chikwata ichi chifambise ndima mumwaka wenhabvu unotevera.
Meya Nhamarare vanoti vachaita zvose zvavanogona kuti Mutare City Rovers irambe iri muPremier Soccer League.