Accessibility links

Breaking News

VaMugabe Vanodoma Makurukota Matsva Zvichitevera Kongiresi yeZanu PF


VaSupa Mandiwanzira vanodomwa segurukota rezvehumhizha mukufambiswa kwemashoko.
VaSupa Mandiwanzira vanodomwa segurukota rezvehumhizha mukufambiswa kwemashoko.

Mutungamiri wenyika, VaRobert Mugabe, vagadza mamwe makurukota matsva muhurumende zvichitevera kupera kwekongiresi yebato ravo.

VaEmmerson Mnangangwa naVaPhelekezela Mphoko ndivo vaitwa vatevedzeri VaMugabe muhurumende, zvinzvimbo zvavanazvo mubato.

Kunyange hazvo vaviri ava vari vatevedzeri vemutungamiri wenyika, VaMnangagwa vacharamba vari gurukota rezvemitemo, ukuwo VaMphoko vari gurukota rezverunyararo, kupodza maronda nekuregererana.

Muzvare Oppah Muchinguri ndivo vaitwa gurukota rezvedzidzo yepamusoro, ukuwo VaSupa Mandiwanzira vachiitwa gurukota rezvehumhizha mukufambiswa kwemashoko.

VaSimon Khaya Moyo vaitwa gurukota rezvekurongwa kwehupfumi, VaSamuel Udenge vakaitwawo gurukota rezvemhando dzemoto. Gurukota rezvechidiki nekuendesa hupfumi kuvatema ndiVa Chris Mushowe, ukuwo Amai Mandy Chimhene ndivo vava gurukota idzva redunhu reManicaland.

VaJoel Biggie Matiza ndivo gurukota idzva redunhu reMashonaland East, Amai Prisca Mupfumira vari gurukota rezvevashandi.

Gurukota rezvevakarwira rusununguko ndiVaChris Mutsvangwa, mudzimai wavo, Amai Monica Mutsvagwa, vakaitwawo mutevedzeri wegurukota rezvekuburitswa kwemashoko.

Amai Tsitsi Muzenda ndivo mutevedzeri wegurukota rezvemhando dzemoto.

Asi VaMugabe havasati vadoma achange ari gurukota rezvemadzimai, chinzvimbo changa chiina Muzvare Muchinguri.

XS
SM
MD
LG