Accessibility links

Breaking News

VaZvidzai Vopomerwa Mhosva yeKupinza Marhedhiyo Munyika Zviri Kunze kweMutemo


Zimbabwe republic Police
Zimbabwe republic Police

Mapurisa emuGweru apomera neChishanu mumiriri weGweru Urban mudare reparamende, VaSesel Zvidzai, mhosva yekupinza marhedhiyo munyika zvisiri pamutemo.

VaZvidzai vapomerwa mhosva iyi mushure mekunge vadeedzwa nemapurisa ekudivi re Law and Order paGweru Central Police Station.

Mapurisa ati VaZvidzai, avo vanovewo nhengo yenational executive yeMDC-T, vakapinza munyika zvisiri pamutemo maredhiyo anopfuura mazana masere.

Gweta raVaZvidzai, VaBrian Dube, vati mugwaro ravo reWarned and Cautioned ravanyora mushure mekuudzwa mhosva yavo, VaZvidzai varamba mhosva yavari kupomerwa.

Nyaya yekupinzwa kwemarhedhiyo aya munyika zvisiri pamutemo yakambopinda mudare mugore ra2010 apo vaive mushandi weDemocratic Councils' Forum, kana kuti DemCof, VaCleopas Shiri, vakamiswa pamberi pedare, vachinzi ndivo vaive vapinza marhedhiyo aya munyika zvisiri pamutemo.

VaShiri vakaramba mhosva iyi dare rikapa mutongo wekuti mapurisa aifanirwa kuzodeedza VaShiri kudare kana vapedza kuferefeta nyaya iyi.

VaDube vati muna Kubvumbi gore rino, mapurisa akadeedzawo VaLast Maengahama, avo vaive mukuru mukuru weDemCof, vachivapomerawo mhosva yekupinza marhedhiyo aya munyika zvisiri pamutemo.

Muna 2006, sangano re Zimbabwe Lawyers of Human Rights rakakwidza kumatare nyaya yemapurisa akanga atorera marhedhiyo vamwe varairidzi mudunhu reMidlands, matare akapa mutongo wekuti marhedhiyo aya adzoserwe kuvaridzi vawo.

Mune imwezve nyaya yaitika mumatare edzimhosva nhasi muGweru, mumwe mutongi wedare ati nyaya yakatarisana nedzimwe nhengo mbiri dzeZanu PF yekurova imwewo nhengo yabato iri zvakaipisisa, ichaenderera mberi musi wa20 Nyamavhuvhu.

Munyaya iyi, mapurisa anoti VaSimbarashe Mutukwa, avo vanogara muGweru, naVaHonest Diura vanogara kuRedcliff, vakarova VaDzingirai Zifungo vachivarambidza kupinda mune mumwe musango weprovincial executive yebato reZanu PF, uyo waiitwa paConference Centre yebato iri muGweru pakutanga kwegore rino.

Asi vaviri ava vari kuramba mhosva iyi.

XS
SM
MD
LG