Musangano webato reDemocratic Party wakatanga neMuvhuro kuPhiladelphia, mudunhu rePennslvania, nhengo dzebato iri dziine chinangwa chekusiya kupesana kwakanga kwave mubato iri.
Kupesana uku kwanga kwakonzerwa nesarudzo dzekutsvaga acharimirira musarudzo dzemutungamiri wenyika dzichaitwa muna Mbudzi pakati paAmai Hillary Clinton naseneta veVermont, VaBernie Sanders.
Vakataura usiku hweMuvhuro vanosanganisira mudzimai wemutungamiri wenyika Amai Michelle Obama, seneta veNew Jersey, VaCory Booker, pamwe naVaSanders, avo vakakurudzira vatsigiri vavo kuti vatsigire Amai Clinton pasarudzo dzichaitwa muna Mbudzi pakti paMai Clinton naVaDonald Trump.
Mumwe wevari kupinda mumusangano uyu semunyarikani akakokwa ndaVaTendai Biti, vanove mutungamiri webato rinopikisa rePeople’s Democratic Party.
VaBiti vanoti vakafadzwa nematauriro akaitwa naAmai Obama, Senator Sanders naSenator Booker, ayo vanoti ano ratidza kuti mubato iri mune hutongo hwejekerere.
“Speech yakanyanyondibata ini ndeya Michelle, Michelle Obama. Michelle iFirst Lady. Even pakutaura kwake achipindura Donald Trump, haana kumbomubata Donald Trump nezita rake, haana kumbomutuka.
“Manje kuZimbabwe tine vamwe vanonzi Mai Mugabe, vekuti pese pavanovhura muromo kutuka chete,” VaBiti vanodaro.
Amai Clinton vari kudomwa zviri pautemo neChipiri manheru semunhu achamirira Democratic Party musarudzo dzemuna Mbudzi idzi.
Murume wavo, uye vakambotungamira America, VaBill Clinton vari kutarisirwawo kutaura manheru aya pamusangano uyu.
