Accessibility links

Breaking News

Hurumende Inozivisa Mazuva Ainofungidzira Kuti Ichabhadhara Vashandi Vayo Mihoro yaChikunguru


Vashandi vehurumende vachiratidzira
Vashandi vehurumende vachiratidzira

Gurukota rezvemabasa nevashandi Amai Priscah Mupfumira vanonzi vazivisa mazuva anofungidzirwa kuti hurumende ingangobhadhara vashandi vayo mihoro yaChikunguru.

Vari muchiuto vanonzi vave kutarisirwa kuwana mihoro yavo musi wa 25 mwedzi uno, vachiteverwa nevezvehutano avo vanonzi vanotarisirwa kutambira mari dzavo musi wa27.

Mapurisa, avo vanosimbotambira vachiverana nemauto, vanozowana mihoro yavo musi wa29 mwedzi uno pamwechete nevashandi vekumajeri.

Vari muboka rezvedzidzo vave kutarisirwa kutambira musi wa 2 Nyamavhuvhu, unove mwedzi unouya, vachiteverwa nevashandi vehurumende vose musi wa 06 Nyamavhuvhu.

Vari pamudyandigere vave kutarisirwa kuzotambira mihoro yavo musi wa12 Nyamavhuvhu.

Sachigaro wesangano rinomirira vashandi vehurumende reApex Council, Amai Cecilia Alexander vanoti sevamiriri vevashandi, vakagara vachiti vashandi vanofanirwa kutambiriswa mari dzavo pamwedzi wavanenge vashandira.

Asi vanoti apa vatambira nemufaro kuziviswa kwemazuva aya, nekushandurwa kwemazuva achatambira vanachiremba navanamukoti, vachiti hurumende yaona kukosha kweboka iroro zvekuti vashandi veko vakasike kuwana mihoro yavo.

Amai Alexander vanoti ivo sevamiriri vevashandi, havana zvavanogona kupikisa kana kuita pamazuva aziviswa aya vasati vatanga vaipira kuvashandi nekunzwa pfungwa dzavo.

β€œIsu tichagara neMuvhuro seApex Council kuti tinzwe zvinenge zvabva muvashandi, sezvo tapira mazuva aya kumasangano ano mirira vashandi kuti asvitse kunhengo dzawo,” Amai Alexander vanodaro.

Hurumende iri kutatarika kuwana mari yekuti ibhadhara vashandi vayo mihoro, izvo zvaita kuti mumwe miviri yakatevedzana vashandi vazowana mihoro yavo mumwedzi unenge uchitevera wacho.

Hurukuro naAmai Cecilia Alexander
please wait

No media source currently available

0:00 0:02:04 0:00
Pekupinda Napo Kuti Muone Zvamuri Kuda

​
XS
SM
MD
LG