Sangano re SNV Netherlands Development Organization – Zimbabwe rinoti riri kushanda nenharaunda dzakawanda munyika mukuyedza kudzidzisa vanasikana nezvavanofanira kuita kana vachiteera.
Amai Lindile Ndebele vanoshanda nesangano iri vanoti parizvino vari kumaruva uko vari kuronga kucherechedza zuva rekuteera kana kuti Menstrual Hygiene Day iro rakacherechedzwa pasi rose nemusi weMugovera. Musi wa 28 Chivabvu ndiwo unocherechedzwa zuva iri pagore roga roga.
Amai Ndebele vanoti vari kushanda nemadzimai vari munharaunda dzakasiyana siyana kuti vagadzire zvekushandisa kana vachiteera kuitira kuti vasarege kuenda kuchikoro panguva iyo vanenge vari kutera.
"Shuwiro yedu ndeyekuti zvikoro zviise mari parutivi kuitira kuti pasave nevanasikana vanotadza kuwana zvekushandisa panguva yekuteera kuitira kuti pashaikwe vanozofoyira kana kutadza kuenda kuchikoro panguva iyi,"Amai Ndebele vanodaro.
Vanoti vachange vane zvirongwa munzvimbo dzakasiyana siyana munyika dzekucherechedza zuva re Menstural Hygiene Day munyika.
Masangano anobatsira madzimai pasi rose anoti zvakakosha kuti madzimai anenge achiteera awane mvura yakachena. Nyaya yekuteera inonzi ikodzero yemudzimai wose inofanira kuremekedzwa.